Ym ïahap ki samla pule doktor na Meghalaya ban ai pynïaid ïa ka Tura Medical College  da ka PPP Mode

Shillong, Jylliew 25 : Ka Association of Meghalaya Medical Students ha RIMS Imphal, ka la phah da ka dorkhas sha u Myntri Rangbah ka Jylla ban pynpaw ba kim hun satia halor ka jingpynbna ba ïa ka Tura Medical College yn pynïaid lyngba ka Public-Private Partnership (PPP) mode.

Kane ka synjuk ki samla pule doktor ki la rah ruh bun ki ishu kiba ïadei bad ka PPP Mode kynthup ïa ka jingnang duna ka bhah pule na ka 85 persen sha ka 50 persen kaban nang pynhiar shuh shuh ïa ka bhah na ka bynta ki samla pule kiba dei hok na Meghalaya.

Ki pynpaw ruh ka jingsyier ba ka jingpynlong private noh mar shiteng na ka bhah pule doktor kan wanrah ïa ka jingkiew ha ka bai pule, kaban buh jingeh kylla pat ïa ki samla kiba wan na ki longiing kiba kham duna ka ïoh ka kot.

Halor kane ka phang, ki samla pule ki la kyntu ia u Myntri Rangbah ba un phai dien biang bad bishar bniah ïa ki polisi da kaba buh hakhmat shwa ïa ka jingdonkam jong ki samla ka jylla.

“Ka Medical College jong ka sorkar ka dei ban long na ka bynta ka jingmyntoi jong ki paidbah,” ki la ong.

  Ka Association ka la pynpaw ruh ïa ka jingkloi ban shim bynta ha ka jingïasyllok ne ka jingïakren kaba kham bniah halor kane ka bynta bad kyntu ruh ban shimkhia ïa katei ka jingkyrpad jong ki.