Khliehriat, Lber 08 : Ki paidbah nongshong shnong jong ka shnong Hingaria, East Jaiñtia Hills District kaba don ha khappud bad ka ri Bangladesh lyngba u Waheh Shnong, u Bah Samson Lamin ki la pynpaw ka jingsngew nguh ïa ka tnat shipai Border Security Force jong ka 172 Battalion kiba la pynlong ïa ka jingsumar bad ai dawai ei sha ki paidbah jong ka shnong.
U Bah Lamin u la ïathuh ba ki don da ki spah ngut kiba la shim dawai bad leh ïa ka medical check up ha kane ka Free Mega Medical Camp ba kynthup naduh ki longkmie, ki longkpa, ki samla kynthei bad shynrang, ki khynnah, ki khunlung kaba la myntoi shikatdei eh ïa ki paidbah nongshong shnong
Ki shipai BSF na ka por sha ka por ki long ki nongïarap kiba ïajan bha bad ngi ki paidbah nongshong shnong kiba im ha ka thaiñ khappud bad ki long ruh kiba kloi ban ïarap wat lada don kano kano ka kam ne kino kino ki jingdonkam kiba kyrkieh ïa ngi ki nongshnong shnong jong ka shnong Hingaria, ong u Bah Samson.
Ki shipai BSF ki long ruh ki paralok ba ïajan bha bad ki nongshnong shnong, ki long kiba kloi ban ai ka jingïatreilang bad ki paitbah bad ngi ju ïa treilang ruh da ka jingïasngewthuh jingmut ha kino kino ki bynta khamtam ha ka shongsuk shongshngaiñ jong ki paitbah ha khappud namar ngi dei ki nongshong shnong kiba ïajan bha bad ka ri Bangladesh, la bynrap u Bah Samson.
