Ïoh jingïaroh ka Monolith Festival, tangba shah khñium ha kawei ka liang

Shillong, Lber 10 : Ka Khasi Hills Autonomous District Council (KHADC) ka la ïoh ïa ka jingïaroh kaba khraw halor ka jinglah ban pynphuh pynphieng ïa ka Monolith Festival mynta ka kynti kaba long naduh ka 07tarik haduh 09 tarik mynta u bnai ha Mawphlang, hynrei ha kajuh ka por ka la mih ruh ka jingkhñium ha kawei ka liang.
Kiba bun ki nongwan kai sha katei ka tamasa ki khmih lynti ban ïoh mad ïa ka bam ka dih tynrai kumba long ka kyrteng ryngkat ka jingkhmih lynti ba ki jaka bam kin don bun tylli bad ruh ha ka dor kaba biang.
“Ngi dap da ka jingkmen ba ka District Council ka la pynlong biang ïa kane ka tamasa, ngi la khmih lynti ba nalor ki prokram ba harukom ngin ïoh mad ruh ïa ka bam tynrai kaba harukom na ki hima bapher bapher,” ong i Kong I Suting.
Itei i longkmie i la kdew ruh ba ka KHADC lada ka pynlong biang ha ka snem ban wan kadei ban peit ba ki jait jingbam ki dei ban long ki jingbam tynrai ym ki jait jingbam kiba lah ban ïoh na ïew na hat.
“Baroh kiba wan lang bad ngi ki la khmih lynti ban ïoh mad ïa ki jingbam tynrai kum na Ri Bhoi, na ki thaiñ Nongstoiñ, na ki thaiñ War bad kumta ter ter ym ki jait jingbam kiba ju die man ka sngi ha ki dukan bad ha ki iew ki hat,” i la ong.
Iwei pat i longkmie khlem da kwah ban pynpaw kyrteng i la ïathuh ba i la wan baroh shi iing ban wan sakhi ïa ka Monolith Festival bad ban wan mad ïa ki jingbam tynrai. “Ki don katto katne ki jait jingbam kiba ngi kwah ban mad tangba ka dor ka la rem shaba palat. Lehse na ka bynta kiba kham bit kham biang ka dang tad palat hynrei na ka bynta ki riew paidbah kiba kwah ban mad ïa ki jingbam tynrai khlem pep ki hap ban pynlut baroh shi taiew ka bai bylla,” i la ong.
Kiba bun ki paidbah ki ïathuh ba ki jingbam ba kham phylla ha katei ka tamasa dei tang iwei ar tylli eh ki dukan ba ki buh ïa ki tham, ki ñianglong, ki shymprong bad katto katne ki kynja khñiang. Hynrei kiwei pat ki long beit kumjuh man ki dukan.
“Ka tamasa tynrai kadei ban don kham bun ki jingbam tynrai hynrei ngi lap ba don tang iwei ar tylli ki dukan ba buh kum ki dohum kum ki sher syngkai bad dohthli,” ong sa u Bah P Swer. Haba kylli kaei ka jingai jingmut, une u rangbah u la ong ba ka KHADC ha u snem ban wan kadei ban bthah ba man ki Hima ki dei ban buh kawei ka dukan bam kaba dei beit tang ki jingbam tynrai.
“Ka KHADC ka la pyrshang, hynrei lada ki kwah ban long janai ki dei ban sdang ïa kane. Bun kiba kwah ban mad ïa ki jingbam dihsha ba ju shet kum ha ki bynta jong ka West Khasi Hills, Ri Bhoi bad kumta ter ter. Katno tylli ki dukan phi ïohi ba ki buh ïa ka shriew, phankaro, putharo, pumaloi bad kiwei kiwei,” u la bynrap biang.
U Bah N Lyngdoh pat u la ong ba ka jingduna ki dukan bam kadei kawei pat ka mat ba ka Council ka hap ban buh hakhmat lada ka pynlong biang ha u snem ban wan naba bun ki paidbah ki hap ban ieng laiñ slem slem ban ïoh bam.
Une u rangbah ruh u la kubur lang ba lada ka KHADC ka ïoh ïa ka jingkyrshan na ka sorkar kadei ruh ban tehlakam ïa ka jingrem dor ka bam ka dih ha kane ka tamasa. “Ban ïoh lehkmen lang da baroh kiba wan, ka bam kadei ban pahuh, ka dor kadei ban long kaba pdeng bad ruh ki jingbam ki dei ban long kiba bha. Ngi kyrmen skhem da ka jingkyrshan jong ka sorkar, ka KHADC ka lah ban pynduna ia ka bai dukan,” u la ong.
Kawei pat kaba jan baroh ki paidbah ki kyntu ïa ka District Council ba kan pyrkhat biang shwa ban pynlong ïa kane ka tamasa ha ka snem ban wan kadei ïa ka por. “Malu mala kumba 80,000 haduh 90,000 ngut ki khun samla jong ka jylla ki duh ban sakhi ïa ka jingiphuh jong ka Monolith Festival tang na ka daw ba ka KHADC ka pynlong ha ki bnai ba ki hap ban ïakhun ïa ka SSLC bad HSSLC. Lada ka lah ban pynlong noh tang ha u bnai Nohprah – Kyllalyngkot lane ha ki bynta ba khatduh jong Lber – Iaiong ma ki ruh ki la ïoh ban lehkmen lang,” pynpaw ki paidbah ba bun.
Tangba kiba bun hi ki ai jingmut ba dei ban pynlong ha u bnai Nohprah – Kyllalyngkot namar ki skul ruh dang ïoh shuti bad ki samla ba ïakhun ïa ka SSLC ne HSSLC ki dang lah ban wan kai shiphang arphang sha kane ka tamasa.
Kyllum lang haba kren pat halor ka tamasa, baroh baroh ki la ai ka jingïaroh ïa ka KHADC bad ong ba ka rukom pynïaid ka la paka palat. Tangba, ki dang don hi kiba ai jingmut ba katei ka tamasa kadei ruh ban long ka kabu ban ailad ïa ki heprit ba dang khie bad ki khun samla ba donsap ba kin ïoh mih rynsan.
“Haba ong tamasa tynrai kadei ka rynsan na bynta baroh kiba kyntiew ïa ka tynrai bad ka kolshor jong ka Jaidbynriew Khasi. Dei ha kum kine ki lympung ba dei ban ai ka rynsan kaba kyrpang na bynta jong ki,” ong iwei i Mei-ieid iba poi sha katei ka lympung ryngkat ka riam tynrai.
Ka khubor kaba itei i riewtymmen i ai sha ka KHADC ka long, “Lada kane kadei ka tamasa tynrai, nga sngewdei ba kiba wan sha kane ka tamasa ki dei ban wan ha ki riam tynrai. Lada baroh ki sdang ban leh kumta, khlem artatien ki nongjngohkai pyrthei na sha shilliang duriaw kin sa long ma ki ki nongrah khubor kylleng ka pyrthei ïa kane ka tamasa tynrai.”