3 tylli ki mawbyrsiew ba teh song bad pynkhlaiñ ïa ka jaidbynriew ong u bah Paul ha ka Monolith

Shillong, Rymphang 10 : Uwei na ki nongïalam ba pawnam bad ieit bha ïa ka jaidbynriew uba long mynta u Myntri ba peit ïa ka tnad Arts and Culture ka tnad kaba peit ban pynneh pynsah ïa ka jinglong tynrai jongki jaidbynriew trai ri trai muluk u bah Paul Lyngdoh u la ong ki don lai tylli ki mawbyrsiew kiba tehsong bad pynkhlaiñ ïa ka jaidbynriew bad kine ki long ka jinglong trai ïa ka khyndew ka shyiap, jinghiarpateng bad ka ktien ka thylliej. ïa kane u la kren ha ka Sngi Saitjain ha ka jingpynhap pyrda ïa ka tamasa Mawbynna ne ka Monolith Festival kaba Lai kaba la long ha Heritage Village, Mawphlang naduh 7 tarik bad kut ha ka 9 tarik.
U la ong “Kane ka tamasa ym tang ba ka wanrah ïa ka jingïalong kawei ka jaidbynriew hynrei ka pyni ruh sha ka pyrthei ïa ka jinglong ïatylli, ka jingpawnam ha ki jinglong tynrai bad kolshor jongka jaidbynriew Khasi.Ka long ruh kum ka rynsan ban ïoh sei madan ïa kiei kiei ki jinglong tynrai naduh ka shad ka tem, ka rwai ka siaw, ki rukom shna jingshna, thaiñ jingthaiñbad kiwei kiwei kiba la ïalam bad hikai da ki longshwa man shwa jong ngi. Lyngba kane ka tamasa ki khun samla ne ki riew don sap ki ïoh ban sei ïa ki sap bad talen jongki. Kane ka tamasa kan ïeng ruh kum ka sakhi ban pyni ïa ka jingriewspah ka deiti ne kolshor jong ki jaidbynriew trai ri jongka jylla Meghalaya”.
U bah Paul u ai khublei ïa ka jingshimkhia ban pynlong ïa kane ka tamasa bad u ong ba u kyrshan ïaka jingangnud jong ka KHADC ban kyntiew bad pynneh pynsah ïa ka kolshor u Khasi.
Kum u briew uba ieit ban pynneh pynsah ïa ka jinglong tynrai jongka jaidbynriew u la buh thong ruh ban wad bniah shuh shuh shaphang ki jaidbynriew riewlum jongka jylla bad halor kane la pynbna ruh da u Myntri Rangbah ha ka Sngi Saitjain ha ka jingkren jongu ba kumba la thrang bad lam khmat da u bah Paul Lyngdoh ka sorkar kan ai ka jingkyrshan sha baroh ki District Council hapoh ka jylla mar 50 lak tyngka ban leh ïa ka jingwad bniah shuh shuh shaphang ka jinglong tynrai jong ki jaidbynriew riewlum kiba don hapoh ka jylla.
U Myntri Rangbah u Conrad K Sangma ha ka jingkren jongu u la ong “Kane ka song tyngka kan ïai kiew man la u snem, khnang ba ki District Council kin lah ban sdang ïa ka jingwad bniah ha ki liang ki bapher bapher, la ka dei ha ka thoh ka tar, ka jingring video ne kiwei kiwei ki lad ban buh rekod ïa ka kolshor kyrpang jong ki jaidbynriew bapher bapher ha ka jylla Meghalaya” ong u Myntri Rangbah.
Ula pynbna ruh ïa ka CM Research Scholarship Program ïa kaba la lamkhmat da u Myntri ka tnad Arts & Culture Bah Paul Lyngdoh ha kaba ka sorkar jylla kan kyrshan kumba 50 ngut ki nongwad bniah haduh mar 3 Lak tyngka ïa kawei ka jingwad bniah ne Research/Scholar ba kin wad bniah ha kaba ïadei bad ka kolshor bad ka histori jong ki jaidbynriew trai ri ka jylla.
Ka jingjied kan long lyngba ka jingthaw ïa ka Committee ka ban khmih bniah ïa ki nongaplai kiba dei hok ban ïoh.