Shillong, Lber 10 : Ka KHADC ka la rai ban pyneh triang ban da ailad satia ïa ka jingthmu jong ka sorkar pdeng lyngba ka Atomic Minerals Directorate (AMD) ba kan leh ïa ka jingwad bniah lane ban khlong ïa u mar Uranium na kino kino ki jaka ba hap ha u pud u sam jong ka Council bad ruh ha ka jylla.
“Ka Council baroh kawei, naduh ki Executive Member haduh baroh ki MDC ngin ieng ban pyneh beit triang ban pyrshah ïa kane ka jingthmu kumba ngi la pyneh naduh mynshwa bad ngin ïai bteng haduh mynta ban pyrshah tih ïa u Uranium,” ong u Chief Executive Member ka Council, Bah Pynïaid Sing Syiem.
U ong ruh ba ka KHADC ka kwah ruh ban phah ïa ka khubor kaba shai sha ka sorkar India bad kumjuh lyngba ka sorkar jylla ba ka Council kan ym ailad satïa ne ai kino kino ki jingbit ïa kino kino ki bor ne ki kynhun ban pynlong ïa ka jingwad bniah ne tih Uranium na ki jaka ba hap ha ka jingpeit jong ka Council.
