Palat lak tuid u paidlang sha Laitryngew, lah ban dei ka Jingïaseng Synod ba heh tam

Laitryngew, Lber 10: Palat lak ngut u paidlang u la poi sha ka jingïaseng KJP Synod Sepngi kaba la long ha Balang Presbyterian Laitryngew mynta ka sngi.
Kane ka jingïaseng mynta ka sngi, la ong kiba bun ba ka lah ban dei ka jingïaseng Synod kaba hehduh naduh ba la sdang ïa ka KJP Synod Sepngi 22 snem mynshuwa.
Hynrei la ïathuh ruh ba ka surok ban leit sha Laitryngew ka la sdang ban sahkut kali naduh 7mer ter ter naduh ka por mynstep bad ki don kiba mih na Shillong por 7 baje mynstep ki dang poi ha Laitryngew haduh ban da sdang ka jingïaseng kaba ar kata ha ka por 1:30 mynsngi.
Kiwei pat ki kali kiba wan na ki thaiñ Jaiñtia Hills ki la poi ha Laitryngew ha ka por 6 baje mynstep.
Ha kaba ïadei bad ka jingshakri, ha ka por 10:30 mynstep ïa ka khubor ka jingïalap ïa ka ktien U Blei la sam da u Rev. KB Snaitang bad la pynshit rhem da ki jingrwai na ka Jingiaseng Khynnah Balang Laitryngew. Nangta ka Choir na ka Balang Kulang, Standing Choir Presbytery bad Shella Presbytery.
Nangta ha ka jingshakri kaba 1: 30 ia ka khubor na ka ktien U Blei la sam da u Rev. GPL Gadew, uba hapdeng ka jingdon lang u MP Bah Vincent Pala, u Myntri Rangbah, u Conrad Sangma,u Symbud Myntri Rangbah, Bah Prestone Tynsong bad kiwei kiwei de ki Myntri, u la ther tyngeh ïa ki bor synshar bad ki nongmihkhmat bad ïa ki paidbah kum ki nongjied.
La ioh ruh ïa ki jingrwai Choir na ka Balang Nongpyndeng, Sohiong, Synod Standing Choir bad Balang Laitryngew.