Shillong, Lber, 10: Ka tnat Pulit jong ka East Khasi Hills District ha ka sngi u Blei ka la pynbna ban ai khusnam T. 1 lak ïa kino kino ki briew kiba lah ban ai ïa ka jingtip kaba bniah kaba lah ban ïoh ksai na ka bynta ban ïohkem ïa kino kino ki briew kiba donkti ban pynbthei ïa u bom IED ha Them Ïewmawlong ha ka miet sngi Saitjaiñ.
U Superintendent of Police ka East Khasi Hills u Rijuraj Ravi ha u kyrwoh ba la phah sha ki lad pathai khubor u la ong ba ïa ka kyrteng jong ki nongai jingtip yn sa buhrieh kyrpang. U SP u la ong ba ki nongai jingtip ki lah ban phah ïa ka jingpyntip sha ka Special Cell lyngba ka Call/Text/WhatsApp ha u mobile number 9366790273 lane lyngba ka email: specialcelLekh.m1p-@gmail.com.
Kum ban shu pynkynmaw hangne, ha ka miet sngi Saitjain ha ka por kumba 10:30 baje mynmiet, u bom Improvised Explosive Device (IED) u la bthei ha kawei ka ïing tap tin bym don shuh mano ruh ba ba shong basah kaba don hajan ka Syndicate Bus Stand, Punjabi Lane, Them Ïewmwlong.
U SP u la pyntip ba ïa u bom IED la buh hapoh ka tin. Ka jingbthei, ïa kaba la suba ba la pyndonkam da ki Gelatin Stick ba la buh hapoh kane ka ing tap shiliang, kaba la pynjulor ïa ki iit jong ki jingkhang iit jong ki ing kiba don markhap bad kane ka ing ba la jia ka jingbthei.
Uwei u nongïaid lynti uba la ithuh kyrteng kum u Lakhan Singh u la mynsaw malu mala na ki bynta jong ka kjat namarba ka jingsied jong ki phngit ba la mih na ka jingbthei.
Shuh shuh u SP u la ong ba ka kynhun kaba donkti ha kane ka kam runar ka dei kaba syriem kum ka jingbthei kaba la jia ha ki snem baladep ha kaba ka seng kieng atiar ba la kheiñ beaiñ ka Hynnniewtrep National Liberation Coyuncil ka la shim ïa ka jingkitkhlieh. Hynrei, ha kaba ïadei bad kane ka jingbthei, tad haduh ha kane ka kynti ba la pynmih ïa kane ka khubor, ym shym la don satia kano kano ka kynhun ne ka seng kieng atiar ka ban shim ïa ka jingkitkhlieh halor kane ka jingbthei.
Ha kaba ïadei bad kane, ki Pulit ki la ujor da ka ejahar ba la rejistar Sadar Police Station na ka bynta ban pynlong shuh shuh ïa ka jingtohkit hapoh ka Unlawful Activities (Prevention) Act bad ka Explosive Substances Act.
U SP u la ong ruh ba ki Pulit jong ka East Khasi Hills ki la kut jingmut ban tohkit bniah bin pa bin ban ïohkem ïa kiba donkti bad ban tian bishar ïa ki hakhmat ka aiñ.
“Na ka bynta kane, ngi pan ka jingïatreilang na ki paidbah ïoh ïa ka jingjop,” la kyrpad u SP.
