Shillong, ïaïong 28: Ka Riiohlang Dhar ka la shah pynrung kyrteng ha ka thup jong ki nongpynïaid na bynta ki jingïalehkai semifinal bad final jong ka AFC Women’s Champions League 2024-25 ha u bnai ban wan, kaban pynlong ïa ka kum ka nong India kaba nyngkong eh ban ïoh bynta kum ka assistant referee ban pynïaid ha kane ka lympung lehkai jong ki klob ka dewbah Asia
Kane ka assistant referee na Meghalaya ka la shah jied napdeng ki 8 ngut ki assistant referee ki ban don na ka bynta ki lai tylli ki jingïakhun.
Baroh ar tylli ki semifinal bad final kin long ha Wuhan, China, ha kaba ka semi kan long ha ka 21 tarik Jymmang bad ka jingïakhun na bynta ka nam lahduh kan long ha ka 24 tarik Jymmang.
Ka Riiohlang Dhar, kaba ïoh ïa ka jingithuh kum ka assistant referee ha ka kyrdan jong ka FIFA, ka la ïoh ban pynïaid ha kiba bun ki lympung ïalehkai bar ri ha kine ki snem. Ka la long ka match official kaba ar jong ka ri India ban ïoh pynïaid ïa ki jingïalehkai ha ka World Cup ha u snem ba ladep jong ka FIFA U-17 Women’s World Cup kaba la long ha Dominican Republic. Ha u snem 2024 la sakhi ruh ïa ka Riiohlang Dhar, ka pulit jong ka Meghalaya Police, ka la shah jied ban don bynta ka ban pynïaid (official) ha ka AFC U-17 Women’s Asian Cup ha Indonesia.
