K a jingkhot khang dukan jong kata ka seng Shillong Citizen Forum (SCF) kum ka dak ban pynpaw ka jingpyrshah ïa ka jingthombor ki lehnoh ha Pahalgam da kaba siat iap ïa 26 ngut ki mynsiem briew im im peit peit kiba dei ki shynrang suda ka long da shisha kaba dei ban pynrem da baroh bad kane ka jingkhot khang dukan mynta ka sngi ym lah ban len ka long kaba jop namar ki dukan ki khang lut ha kylleng ki bynta jongka sor Shillong lait noh tang ha ki katto katne ki jaka ba plie ki dukan. Hooid ki paidbah ki kloi ban ïashim bynta bad ïa sngewlem haba jia kum kine ki jingjia, hynrei kaba lyngngoh ka long ba hangne ha nongbah Shillong lada khot khang dukan, khang shnong ne khang ophis da no dano ruh ka ju seisoh beit khlem da bishar bad pynshong nia bha mano ba khot.
Ym dei ba kynthoh ne kynnoh ïa ka SCF hynrei ym da ju kham ïoh sngew koit ïa kane ka seng ba ka trei ïa kiwei kiwei ki kam hangne ha nongbah Shillong lait noh tang mynta ka kynti ba ka mih kynsan ban khot ïa ka jingkhang dukan.Namar ba ym ju kham ïoh sngew ïa ki kam jong kane ka seng wat ka HITO ruh ka la ai da ka jingthoh sha ka Deputy Commissioner ban dawa pan jingshai na kane ka seng, kiei kita ki nongkitkam jongka. Balei ba ong kumne namar mih bun ki jingkynnoh ba kane ka seng ka dei kaba ki nongkitkam ki don shabar ka nongbah Shillong.
Hooid ha kaba ïadei bad ka jingkhot thang mombati bad jingkhang dukan na ka bynta ka jingjia ha Pahalgam ka long kaba dei eh namar baroh hi dei ban ïa pyrshah ïa kum kine ki jingleh riewkhlaw jong kitei ki lehnoh kiba shu siat iap im im peit peit ïa ki mynsiem briew. Kane ka jingjia ka la pynbitar lep da shisha ïa ka India kaba la kynnoh tyngeh ïa ka jingiadonkti ka Pakistan ban ai jingkyrshan ïa ki lehnoh kiba donkti ha katei ka jingjia. Ka India ym tang ba ka bitar ka byrngem ruh da ka thma bad ka la phah ruh ïa baroh ki nong Pakistan ban mih noh nangne na India kynthup nangne na Meghalaya.
Lada jia ba poi shaduh u pud ban jia ka thma ka jingma ka long khamtam ïa kane ka thaiñ shatei lam mihngi bad khamtam eh ïa ka jylla Meghalaya namar kiba bun ki head quarter jong ki shipai naduh ki shipai ryngkew, ki shipai suiñ ki don ha khap ka sor Shillong. Kumta kane ka thaiñ ka lah ban kylla kum ka madan thma khamtam lei lei lada jia ba ka China ka ai jingkyrshan ïa ka Pakistan. Hynrei ngi kyrmen bad duwai ba kan ym poi shaduh u pud jong ka thma tang namar ka jingiap kitei ki 26 ngut ki mynsiem briew.
Sa kawei kaba kwah ban buh jingkylli ka long balei haba jia ki jingjia ha Manipur kata haba don ka jingïaumsnam bad iap da ki spah ngut ki briew ym don ki seng kiba wan shakhmat ban khot thang mombati ne ban khot khang dukan? Ha ka jingshisha ka SCF ka la dei ban mih shakhmat ruh ha kato ka por ban ïalam ïa ki paidbah ban ïasnoh kti lang ha ka jingthang mombati bad jingkhang ïew khang dukan kum ka dak ka jingpyrshah halor katei ka jingïaumsnam khamtam ba ka sorkar pdeng kam shym la shim khia haduh katta katta ban tem ïa katei ka jingïaumsnam.
Kane ka long kum ka jinghikai ba haba shim ïa kano kano ka sien jam shim shwa na ka bynta ka thaiñ bad sa jam pat shabar jongka thaiñ. Ai ba kane kan long ka jinghikai ia baroh ki seng bhalang ym tang ïa a SCF ba shwa ban shim ïa kano kano ka sienjam shim daka lynti ka ban ym shah kynthoh kylla.
