Iehnoh u Saleng ïa ka shuki Chairman ba shimti noh kum u Chief Whip ka Liang Pyrshah.

Shillong, Nailur 20 : U MLA ka Congress na Ganbegre u Saleng A Sangma u la ïehnoh ïa ka shuki Chairman jongka Public Account Committee (PAC) jongka Assembly namar u la shah thung ban long kum u Chief Whip ka Liang Pyrshah.
U la ong u la hap leh ïa kane hadien ba la dep wanrah ka jingpynkylla ïa ka Rules of Procedure and Conduct of Business in the Meghalaya Legislative Assembly ba u ne ka Chairman jongkano kano ka Committee yn jied da u Lamphang napdeng ki dkhot kiba ym pat shah thung ha kino kino ruh ki kam hapoh ka Assembly Secretariat kiba ïa ryngkat kyrdan bad ki myntri sorkar.
Shwa kane u symbud myntri rangbah ba dei peit ia ka tnad Parliamentary Affairs u bah Prestone Tynsong u la dep pyntip hapoh ka ïing dorbar halor ka jingïehnoh jong u Saleng Sangma ïa ka shuki Chairman kaba u la leh kat kum ki kyndon pynïaid dorbar.