Nongpoh, Lber 04: 3 ngut ki briew kila mynsaw ha ka jingïatyngkhuh kali mynta janmiet hapdeng kawei ka sumo bad ka Maruti 800 (local taxi) ha surok Shillong By Pass kaba hap haka shnong Umroi Nongrah.
Katkum ka jingtip bala ioh lum, la ong ba kane ka jingjia kala jia haka por kumba 4:30 eiei mynta ka janmiet ha kaba katei ka local taxi kaba don ïa u number ML 05 L 1483 ka dang mih na Bhoirymbong ban leit sha Umiam katba katei ka sumo kaba don ïa u number ML 06 A 8396 ka dang don ha lynti ban leit sha Bhoirymbong, hynrei yn poi ha ka shnong Umroi Nongrah kitei ki 2 tylli ki kali kila ïa tyngkhuh haduh ba 3 ngut ki briew ba shong ha katei ka Maruti kila mynsaw bad ka kali kala pra phom.
Katkum ka jingïathuh jong ki briew ba shong ha katei ka sumo kila ong ba u nongñiah katei ka Maruti 800 u la shoh khawiang bad um lah shuh ban tehlakam ïaka kali haduh ban da ïatyngkhuh bad katei ka sumo, watla u nongñiah katei ka sumo u la pyrshang ban kiar na katei ka Maruti, hynrei namar ka jingñiah khlem akor um lah shuh ban kiar tad haduh ban jia syndon katei ka jingaksiden.
Ïa kitei ki 3 ngut kiba mynsaw ha katei ka jingjia aksiden la rah noh mar mar sha Bhoirymbong CHC ban ioh ka jingsumar ba kyrkieh, bad naka liang ki pulit ka Khapmara PIC ki dang pynlong ka jingtohkit halor katei ka jingjia.
