Shillong Lber 04: U Nongïalam ka liang pyrshah u Mukul Sangma ha ka sngi baar u la ther tyngeh ïa ka sorkar ba la MDA ba la ïalam da u Conrad K Sangma uba la aiti ïa ka khyndew ka shyiap sha ka sorkar Assam ha kaba ïadei bad ka jingïakren pynbeit pud kaba la long ha ka phase kaba nyngkong hapdeng kine ki artylli ki jylla.
Haba kren sha ki lad pathai khubor u Mukul u la ong ba um ju pdiang satia ïa ka jingïasoi jingmynjur bad ka Assam na ka bynta ban pynbeit ïa ki 6 tylli ki jaka ïakajia pud ha ka snem 2022.
U Myntri Rangbah ba rim ka jylla u la ong ba ha ka por ba synshar ka Congress ha ka jylla la dep ban pynkhreh bad la aiti ruh ïa ki kot ki sla kaba kam ba kine ki 12 tylli ki jaka kidei kiba hab hapoh ka jylla.
“Halor kane ka nongrim jong ka jingpynbiang ïa ki kot ki sla ka sorkar MDA ka la ïasyllok bad ka la aiti noh ïa kine ki jaka kaba ngi la kam,” u la kynnoh da kaba bynrap, “Kaei ka jingïapher hapdeng jong ngi ha ka por ba la synshar da ka Congress bad ka sorkar MDA hato kam shong hok ïa kane ka jingkam jong ngi lyngba ki kot ki sla bad phi kam khlem ka nongrim bad ki kot ki sla. Ngi la pyndep ïa ka kamram bad kane ka dei ka bynta kaba kongsan bha namar ngi la kam ïa ki jaka puta lyngba ki kot ki sla kiba biang.”
U la pynkynmaw ruh ba ki kot ki sla ki dei kiba kongsan na ka bynta ban kam ïa ka khyndew ka shyiap jong ka Meghalaya ym pat ban aiti sha ka jylla Assam.
“Kane ka dei ka jingïapher hapdeng ka sorkar u Conrad Sangma ba la aiti sha ka sorkar Assam ïa ka khyndew ka shyiap. Kadei kane ba ngi la pynpaw ïa ka jingpyrshah bad dei halor kane ba ngim lah ban pdiang ïa kane ka jingmynjur haduh kine ki sngi. Hato kane ka dei ka jingmynjur jong ki paidbah, buh jingkylli u Mukul.
“Lada phim lah ban kam ha kano ka rukom phi la wengnoh ïa ki pulit na kine ki jaka. Kano kano ka jaka kaba phi la kam phi dei ban synshar halor jong ki, bad ki aiñ ruh ki dei ban treikam ha ka kyrdan jong ka parliament bad jong ka jylla,” bynrap u Dr Mukul.
