Shillong, Lber 04: U Nongïalam ka liang pyrshah u Mukul Sangma ha ka sngi baar u la ong ba ka dei ka kamram jong u Myntri Rangbah ban buddien bad ka sorkar pdeng ha kaba ïadei bad ka jingpyntreikam ïa ka inner line permit (ILP) ha Meghalaya.
Kane ka jingkren jong u ka la wan hadien ba ka sorkar pdeng ka la bthah ïa ka sorkar jylla ban aiti ïa ka pisa kaba la kot T. 200 klur kaba la mang ha ka snem 2017 na ka bynta ban thied ka jaka ha Byrnihat bad kumjuh ruh na ka bynta ka Shillong railway project hadien ba la mad ïa ka jingeh kaba la mih na ki kynhun kiba pyrshah na ka daw jong ka jingma kaba lah ban wan na ka jingwan rung kyrthep ki bar jylla.
Na ka liang jong u, u la ong ba lada pyntreikam ïa ka Meghalaya Residents Safety and Security Act (MRSSA), 2016 kan long ka lad ka lynti ha ka jaka jong ka ILP ka ban long ruh ka lad ban ïada na ka jingwan rung kyrthep ki bar jylla bad ki mynder ri sha kane ka jylla.
Haba kren sha ki lad pathai khubor u Mukul u la ong ba ka donkam ïa ka jingïasyllok bad ki nongshong shnong ba kynthup ïa ki sengbhalang ha kaba ïadei bad kane ka jingwan rung kyrthep jong ki bar jylla bad lada pyntreikam ïa ka rel khlem ki lad jingïada ka long ka kam kaba eh bha.
“Nga la ïohi ïa ki jingkren bad ki sengbhalang kim long pyrshah ïa ka roi ka san hynrei donkam pat ïa ki lad jingïada na ka jingwan rung kyrthep jong ki bar jylla,” u la ong.
Haba kylli la ka jingai ïa ka ILP kan ïarap ha ka ban pyntreikam ïa ka railway project ha Meghalaya, u Myntri Rangbah barim u la ong ba hapoh ka Ïingdorbar Thaw aiñ la dep ban mynjur bad ka dei ka kamram jong u Myntri Rangbah ban buddien ïa kane ka kam bad ka sorkar pdeng.
“Watla katta ruh ngam kynnoh ïa u Myntri Rangbah ba um lah ban pyntreikam ïa ka ILP hynrei kadei ka kamram jong u ban buddien ïa kane ka kam. U la ïoh ka bor lyngba ka jingmynjur hapoh ka ïingdorbar. Kane ka dei ka bor jong u bad ha ka kyrteng jong ka jylla u la hap ban shim ïa ki jingkitkhlieh,” u la ong.
Na ka liang jong u Mukul u la banjur halor ka MRSSA, 2016 kaba dei ka lad ka lynti kaba lah ban ïarap bad ïada na ka jingwan rung kyrthep ki mynder ri.
