Nongpoh, Jymmang, 19: Ka skulbah Mahatma Gandhi University, Meghalaya ha ka sngi saitjaiñ ka la pynlong ïa ka seminar halor ka phang “Seeds of Change: How NGOs Cultivate Higher Education Opportunities for Rural & Tribal Youth” ha Conference Hall jong katei ka skulbah namar lyngba ki kynhun trei mon sngewbha (NGOs) kiba don ka mon ban trei kumno ban kyntiew ïa ka pule puthi ha ki jaka nongkyndong khamtam ki riew lum.
Ha kane ka sngi la sakhi ruh da ka jingdonlang ka Dr. Sarika Dixit, Registrar ka skulbah MGU, Prof. (Dr.) Sagar Onkarrao Manjare, Vice-Chancellor, Dr. Mohan Bhattacharya, University Advisor, Prof. Krishna Reddy bad Dr. Amalesh Adhikary, Dean jong ka MGU bad kiwei kiwei nalor ki nongïalam jong ki kynhun bapher bapher ba kynthup ïa u Bah Aristone Manbha Ryndongsngi bala mihkhmat na ka Synjuk Ki Seng Samla Shnong, u samla Ïaraplang Nongbri, Assistant Education Secretary ka Khasi Students Union, u Bah Ricky Majaw, General Secretary FKJGP, North Khasi Hills District bad kiwei kiwei.
Lyngba ka seminar la ïoh ruh ban ïathir ïatai halor shibun ki mat ba kongsan ba kumno ka jingïadei bad ka jingïatreilang jong ki kynhun trei mon sngewbha, ki skulbah bapher bapher ban kyntiew ïa ka pule puthi khamtam ban long kum ka jingkieng sha ki jaka ba kham kyndon ba dang duna ka pule ka puthi, namar ka jingnang jingstad khamtam ki jingpule ba kham shalor ki donkam ïa ki samla ban nang pyniar bad pynproh ïa ka jingmut jingpyrkhat.
Shuh shuh lyngba ka jingdon lang ki nonghikai, ki samla pule bad kumjuh ruh ki nongïalam na ki kynhun bapher bapher la ïoh ruh ban sam ïa ki jingmut bad symboh ha katei ka sngi ba kumno ka imlang ka sahlang ka donkam ïa ki samla kiba angnud ban wad ïa ka jingnang jingstad bad khamtam ban long ruh ka sharak sha kito ki jaka ba ka pule puthi bad ka jingnang jingstad ka shem jingeh ban rung bad bsuh.
