Kem bad tian bishar ki 3 shnong ïa u Bah Darning Waniang namar ki kam tuh masi
Mawkyrwat, Jymmang 19: Ki nongïalam jong ki lai shnong ba kynthup ïa ka Shnong Awro, Shnong Demnar, bad Shnong Myriem ki la pynshai halor ka jingkynnoh jong u Bah Darning Waniang ba ki samla ba la tip kyrteng kum u Bah Shanbor Paliar, u Bah Meljohnroy Paliar ki la shoh bad ktah kti ïa u ha kine ki khyndiat sngi.
Ki Sordar jong ki lai shnong, kata u Bah Kornilius Thongnibah bad u Bah Batsingland Lyngdoh kiba la mih shakhmat ban pynshai lyngba ki lad pathai khubor bad ki la pynrem jur ruh ïa ka jingkynnoh jong u Bah Darning Waniang pyrshah ïa ki samla da kaba ong ba ki la shoh bad ktah kti ïa u, hynrei ha ka jingshisha ki paidbah jong ki lai shnong ki sakhi ba kam shym la don kum kata ka jingkynnoh jong u Bah Darning Waniang khamtam u samla Meljohnroy Paliar um shym la don ha ka sngi ba la ïohkem bad bishar shong ïa u Bah Darning Wanniang.
Shuh shuh ki lai shnong ki la pynshai ba ïa u Bah Darning Wanniang la ïoh kem bad ha ka miet 13 tarik Jymmang, 2025 katba u dang wan buaid ha ka shnong Demnar hajan Ïingmane ha kaba ki samla jong ka Balang ki dang thmu ban pynlong ïa ka jinghikai jingrwai na ka bynta ka jingïaseng.
Ki samla ha kata ka por, la ong ba ki la phah ïa u ba un leit phai noh sha la ïing hynrei ynda la kut ka jinghikai jingrwai la lap pynban ba ula rung bad thiah ha ka kali jong ki samla kiba dang hikai jingrwai bad ynda ki la kylli u la jubab ba u ap ïa ki masi.
Kumta dei ha kane ka por ki samla ki la bat bad tohkit bha u Bah Darning Wanniang halor kata ka jingjubab buaid jong u bad dei hadien ka jingkylli bha u la phla ba u dei uba ju tuh ïa ki jingri kum ki masi bad ki blang.
Kumta hangta hi ka shnong ka la bat ïa u bad bishar bad ha kane ka jingbishar u Bah Darning Wanniang u la phla ba ki don da ka kynhun kumba 7 ngut kiba ju leh ïa kine ki kam tuh kam thiem bad 4 ngut n akita la ïoh ban kem noh, katba 3 ngut ki dang ïoh phet rieh.
Ki 3 shnong kum ka Demnar, Awro, bad ka Myriem ki la kyrpad ïa ki bor jong ka aiñ ba kin shimkhia halor kane ka kam khnang ba kan ym jia shuh hadien habud bad ba ka shongsuk shongsaiñ kan neh kumba ka long ha ki sngi kiba la leit noh.