Nongpoh, Jymmang, 19: Ka University of Science and Technology, Meghalaya kaba don ha Killing, Ri Bhoi District, ka la pynpaw ïa ka mynsiem jong ka jingkmen bad da ka jingsarong ka la pynbna paidbah ba u Prof. Gauri Dutt Sharma, uba dei kum u Vice Chancellor katei ka skulbahu la shah jied kum u President ka National Academy Of Social Science, Allhabad ha ki 2 snem kynthih kata naduh u snem 2025-2026 bad 2026-2027.
Kane ka jingpynbna ka USTM ïa ka jingshah jied u Vice Chancellor kum u President ka Natioal Academy of Social Science, Allahabad, ka dei hadien ba u la shah jied da ka Indian Social Science Academy.
U Vice Chancellor ka USTM u Prof. Gauri Dutt Sharma, halor kane ka jingshah jied kum u President ka NASS, Alahabad da ka ISSA, u la ong, “ Ka long ka khubor kaba sngewkmen halor kane ka burom kaba u la shah jied kum u President ka National Academy of Social Science. U khmih lynti ruh ban ïa trei ryngkat bad ki samla pule ne ki riewshemphang ha ka pule ka puthi, ki skulbah bapher bapher na ka bynta ban dang pynkhlaiñ ïa ka jingwad bniah bad kiwei kiwei ki lad ki lynti ban pynklaiñ ïa ka jingnang jingstad ba ka pule ka puthi”.
Ka skulbah USTM ka la ai ka jingkyrshan bad ka pynpaw ruh ïa ka jingsngewnguh ïa ka Indian Social Science Academy (ISSA), na ka bynta ka jingai burom ïa u Vice Chancellor u Prof. Gauri Dutt Sharma uba la shah jied kum u President ka National Accademy of Social Science.
Halor kane ka jingïoh burom, u Chancellor ka USTM, u Mahbubul Hogue, u la ai ka jingkhublei kaba kyrpang ïa u Vice Chancellor u Prof. Gauri Dutt Sharma, halor kane ka jingjop jong ka jong u bad u la pynpaw ruh ïa ka mynsiem jong ka jingsarong ba ka ISSA ka la jied ïa u ban long kum u President ba thymmai ka National Academy of Social Science, Allahabad.
U Prof. Sharma u dei u briew uba don ka jingïohi jngai bad u briew uba don ka mynsiem jong ka jingïaid shah bad khamtam uba don kata ka jingkitkhlieh ban kyntiew ïa ka pule ka puthi bad ruh ban ai shibun ki buit treikam na ka bynta ban kyntiew ïa ka pule ka puthi ha ka jylla bad ka ri.
U la ïoh pdiang ruh ïa ka khusnam ba la tip kum ka Doctor Narasimhan Medal award na ka bynta ki kam wad bniah jong u ha u snem 1994 bad u la pyndep ruh ïa ka post-doctorate (honorary) na Sheffield University, United Kingdom ha u snem 1991.
Kum u rangbah, uba don bynta ha kaba kyntiew ïa ka pule ka puthi, u Prof. Sharma u la don bynta ha ki kam bapher bapher kiba kynthup naduh ka ri bad shabar ka ri, ha kaba saindur ïa ka pule ka puthi bad ka jingnang jingstad kaba dei katkum ka juk ba mynta.
