Shillong, Jymmang 19: Ka khubor ba la ïoh na ki pulit la ïathuh ba ha ka 16 tarik mynta u bnai ha ka por kumba 11.30 mynmied, ki pulit ki la ïohkem ïa uwei u nong Bangladeshi uba la ithuh kyrteng da u Md. Al Amin ba la 22 snem ka rta.
Ha kawei pat ka jingjia ki pulit ki la ïathuh ba u Subodh Kumar Singh u la phah ka jingujor ba ha ka janmied jong ka 13 tarik mynta u bnai, ki runar kiba la kah durkhmat ki la shoh ïa u ha dukan kaba don ha Ïewduh, Shillong bad ki la phet krad.
Shuh shuh na ka liang jong ki pulit ki la ïathuh ba ka kong Jelima Lytep ka la phah ka jingujor ba ha ka 11 tarik mynta u bnai ha ka por kumba 10 mynmied, ki runar bym lah ban ithuh ki la tuh ïa ka masi jong ka napoh sem kaba ha ka shnong Lummuriap (WJH).
Na ka liang jong u Wisleness Salahe u la phah ka jingujor ba ha ka 14 tarik mynta u bnai, ki runar bym lah ban ithuh ki la tuh ïa uwei u generator battery bad kumba 100 litre ka umphniang diesel kaba shongdor kumba T. 15,636/- na ka shnong Shilliang Myntang (WJH).
