Shillong, Lber 14: Ka long ka kabu bad ka jingmyntoi ïa ki khynnah samla ka jylla kiba don ïa ka sap lehkai phutbol hadien ba ka klob ba ïakhun ha ka Indian Super League- ka NorthEast United FC hynne ka sngi ka la ïateh soskular bad ka Sorkar jylla Meghalaya ban sdang ïa ka shlem ai jinghikai phutbol lane ka football academy kaba la khreh ban seng ha Mawkhanu- New Shillong.
U trai jong katei ka klob ISL- u John Abraham u ba dei ruh u khlur ak phlim ba pawnam ka Bollywood u la wan jngoh ïa ka nongbah Shillong hynne ka sngi bad sakhilang ïa ka jingplie ïa ka kylla kaba ar jong ka Talent Identification bad Elite Pathway Programs 2024-25, ha SAI- NEHU ryngkat bad u MR ka jylla- u Conrad K Sangma.
Katkum ka kyrwoh na ka tnat Sports & Youth Affairs ka Sorkar jylla la pyntip ba ka “jingïateh” la mynjur hapdeng katei ka klob bad ka tnat ïalehkai ban kyntiew ïa ka football hapoh ka jylla.
Ka jaka jong ka sorkar kaba ha Mawkhanu la bynta kyrpang ïa ka NEUFC, ka ban sa tei ïa ka shlem ai jinghikai phutbol lane ka football academy ha katei ka jaka ïa kaba ka kynhun NEUFC ka lah ban kilanmet bad ban ai jinghikai ban kyntiew ïa ki khynnah samla ka thaiñ ha ka football.
Watla kata ruh, kane ka jingïateh ym pat shym la thikna, ha kaba ki kyndon bad ki aiñ ka Sorkar ban pynurlong ïa kane ka jingthmu ka dang ïaid shakhmat, la bynrap ka kyrwoh na ka tnat Sports.
Ha kine ki snem ba ladep, la bna khubor ïa ka jingthmu u Abraham u ba la wan jngoh la bun sien ïa ka nongbah Shillong ban ïatreilang bad ka sorkar ha ka ban seng ïa ka shlem ai jinghikai hapoh kane ka nongbah ban kyntiew ïa ki khynnah samla ka thaiñ ha ka phutbol khnang ba kin pyndonkam thikna ïa ka sap ryngkat ka jingkhmihlynti ban sei ïa ki player ban mih madan ïa ka NEUFC.
