Ryngkat u John Abraham plie u MR ka jylla ïa ka kylla ba Ar jong ka Talent Identification bad Elite Pathway Programs

Shillong, Lber 14: Ka tnat Sports and Youth Affairs jong ka Sorkar jylla hynne ka sngi ka la pynlong ïa ka jingïalang ban plie ïa ka kylla ba Ar jong ka Talent Identification bad Elite Pathway Programs 2024-25, ha SAI-North Eastern Hill University, Shillong, kum shi bynta ban rakhe ïa ka jingnang roi ki khynnah samla ka jylla ha ki rynsan bapher bapher kum ha ka sports bad kiwei kiwei de.
La plie ïa ka bynta ba Ar jong ka Talent Identification and Elite Pathway Programs 2024-25 da u Myntri Rangbah ka jylla, u Conrad K Sangma uba long kum u Kongsan, bad la wan sakhilang da u khlur ak phlim Bollywood-u John Abraham u ba dei trai jong ka klob phutbol North East United F.C. (NEUFC) .
Kiba ïadonrynglang ha kane ka sngi ki kynthup ïa u Chief Secretary-u Bah DP Wahlang, ka Director of Sports & Youth Affairs-ka Kong Isawanda Laloo, u Working President ka MSOA-u Bah John F Kharshiïing bad kiwei kiwei kiba la shah khot sngewbha.
Ha kane ka sngi palat 500 ngut ki khynnah samla jong ka thaiñ ki la shah khot sngewbha ban pdiang ïa ki jingmyntoi kiba na ka liang jong ka tnat Sports & Youth Affairs ka la pynkhreh na bynta jong ki.
Haduh mynta, ki don haduh 14,500 ngut ki nongïashimbynta kiba la ïoh ban pyrshang ïalade ha ka Talent Identification Program da kaba pyndonkam da ki kor kane ka juk (scientific method) ban lap ïa ki khynnah samla ba don ïa ka sap kaba kyrpang.
Lyngba ka EPP, kumba 200 ngut ki nongïalehkai (athlete) ki la ïoh ban don bynta ha ka prokram kilanmet kaba shi snem. Na bynta ka samoi 2024-25, ki don haduh 10,000 ngut ki nongïashimbynta, kynthup ruh ïa ki khynnah ba dang 6 snem, kiba hap hapoh ka Talent identification program, bad palat 200 ngut ki nongïalehkai (athlete) kiba hap ban pyndep ïa ka EPP Camp kaba ar.
Lyngba kane ka prokram la khmihlynti ban nangsei ïa ki khynnah kiba don ïa ka sap ïalehkai. Lah ban kdew ruh ba 12 ngut ki khynnah samla ki la shah jied ban nang pyntbit shuh shuh ïalade lyngba ka Super Elite Program, ba kin long kiba kynsai ym tang hapoh ka ri hynrei wat shabar ri ruh kumjuh.
Ha kane ka sngi la ïoh ruh ban sam khusnam da ka Cash Award sha ki nongïalehkai (athlete) ka jylla kiba la jop takma ha ki rynsan ïakop bapher bapher. Ka mang tyngka kaba la kot 68 Lak la sam sha ki 297 ngut ki nongïalehkai (Athlete) kynthup bad ki Coach ha kane ka sngi.
Na ka liang jong ka tnat Sport & Youth Affair ka la pynbna ba kan ïai bteng ban pynlong kum kane ka prokram khnang ba baroh ki nongïalehkai ba khur takma napoh ka Meghalaya kin ïohpdiang ïa ka Cash Award lyngba kane ka Scheme.
Shuh shuh, la pynbna ruh ïa ka Sports Scholarships ba la bynta khanng ïa ki nongïalehkai (athlete) mynta u snem. ïa kane ka Scholarship yn sdang ban pyllait naduh u ïaïong 2024 haduh Lber 2025, ha kaba ki nongïalehkai kin ïohpdiang ïa ka mangtyngka man u bnai katkum ka syrnod jong ka scheme ba la pyllait dang shen.