Shillong, Naitung, 05: Kum ka jingthmu ban pynkylla ïa ka sor, ka tnat Urban Affairs ka sorkar jylla da ka jingïatreilang bad ka Shillong Municipal Board ha ka sngi Thohdieng ka la pynlong ïa ka jingïasyllok ïa ki paidbah ka nongbah halor ka Mission Clean Shillong 2027 ha kaba ïa kane ka prokram la pynlong ha State Convention Centre, Shillong.
Ha kane ka jingïasyllok la donlang ki Rangbah Shnong, ki civic body, ki riewshemphang, bad ki nongshong shnong na ka bynta ban thaw ïa ka rukom treikam na ka bynta ka jingkhuid, ka jingpynjyrngam ïa ka Shillong, ha shwa ka jingpynlong ïa ka National Games 2027.
Ha ki jingkren sdang u P.K. Boro, Director, Urban Affairs, u la banjur halor ka jinglong kongsan ka jingdonkti naduh ki shnong bad ki nongshong shnong.
U la kyntu ïa kiba shim bynta ban sam ïa ki jingsngewkhia jong ki bad ïa ki jingmut da kaba ong ba kane ka jingïashim bynta ka long kaba donkam na ka bynta ka sorkar haba ïadei bad kane ka Mission.
Katba u Bah F.B. Chyne, Executive Engineer, Shillong Municipal Board, u la batai halor ka jingpyntreikam haba ïadei bad ka jingkit ïa ki jaboh jabaiñ ha nongbah.
U la ïathuh ruh halor ka jingbuh ïa 74 tylli ki kali kit ñuit ban pynkhlaiñ ïa ka jinglum ïa ki jaboh ha kane ka nongbah.
U la ïathuh ruh ba ka jingkit ñuit ha ka shisngi ka long 170-ton bad la dep buh ruh ïa ka composting plant, nangta 4 tylli ki waste recovery centre ba la dep shna bad kiba la treikam bad kumba 15,000 sq. m. ka jaka theh ñuit la dep ban pynbha.
Katba u Bah K. Kharumnuid, Mission Director, Swachh Bharat Mission (Urban) 2.0, u la pynbna ïa ka jingïalap “My City, My Pride” kaba dei ban pyndep ha u bnai Risaw 2025.
Ïa ka draft mission document, ba la pyllait da u Myntri Rangbah u Conrad K Sangma ha ka World Environment Day, ka la long shi bynta na ka Mission 10 (2022-2032) vision na ka bynta ban kyntiew ïa ka jylla.
Ha kane ka jingïasyllok la ïohi ka jingïashim bynta na ki nongmihkhmat ki Dorbar Shnong kiba la buh ki jingkylli halor ki septic tank, ka jingpynduna ki ksew surok, ka jingwah ïa ki waïar cable, bad ka jingtreikam ki waste management agency.
