Ka jingthung kam ïa ki nonghikai ha ki skul Lower Primary ka la jan dep, ïathuh u Rakkam

Shillong, Naitung 05: U Myntri ka tnat Pule Puthi ka sorkar jylla u Rakkam A Sangma u la pynbna ba ka jingthung kam ïa ki nonghikai ki skul lower primary ka la jan dep artat.
“Nga dang bishar kam biang ïa kane ka bynta. Ha Baghmara, South Garo Hills district la dep ban pynbna laitkam mynta la 6 bnai, katba ka jingpynkhreh ïa ka roster ka dang ïaid sha kiwei pat ki district,” ïathuh u Sangma sha ki lad pathai khubor.
Na ka liang u Myntri u la khmih lynti ban sa pynmih ïa ki jingpynbna laitkam na ka bynta ki kam nonghikai sha baroh ki district ha kine ki khyndiat sngi ban wan. U la banjur da kaba ong ba ka jingpynslem ka dei na ka daw ki jingeh ha ki kam technical, hynrei u la khmih ba kane ka kam ban sted khnang ban pynthikna ba ki skul kin ym mad ïa ka jingbym don ki nonghikai.
U Sangma u la pynpaw ba ki don kumba 600 spah tylli ki kam nonghikai ba lait ha ki skul lower primary jong ka sorkar bad 150 haduh 200 tylli ki kam kiba lait ha ki skul higher secondary.
U Myntri u la pynpaw ruh ïa ka jingpyrshang ka sorkar ban kyntiew kyrdan ïa ki skul secondary sha ki higher secondary bad da palat 30 tylli ki skul yn kyntiew kyrdan mynta u snem.
Shuh shuh u Myntri u la pynpaw ruh ïa ka jingbuh ïa ka skul janmiet ne ka evening section ha Kiang Nangbah ban ïarap pynïoh jaka pule ïa ki samla kiba la pass bun ha kane ka eksam SSLC ba dang shudep.