Shillong, Nailar 04: Ka Sorkar jylla ka la pyntip ba ka la dep ïasoi ïa ka jingmynjur bad ka Mother Dairy Fruits and Vegetables ban kyntiew ïa ka jingïatreilang ha ka ban pynïaid ïew ïa ki marrep ha Meghalaya.
ïa ka memorandum of understanding (MoU) la soi hapdeng ka Meghalaya State Agricultural Marketing Board (MSAMB) bad ka Mother Dairy Fruits and Vegetables (MDF&V), kaba ïasoh bad ka National Dairy Development Board (NDDB).
Kane ka jingïatreilang ka thmu ban khmih ïa ki jingeh ba la mad da ki nongrep ka jylla khamtam ban ïoh ïa ka ïew kaba beit beit bad ka kam kaba ki la dep ban trei ne pynmih.
Ki riewshemphang na ka Mother Dairy kin treilang bad ka sorkar jylla ban kyntiew kyrdan ïa kine ki kam kiba mynta jong ki nongrep bad ban pynleit jingmut ruh ban wadbniah halor ki jingthung bad ban kyntiew ïa ki jingpynmih jong ki nongrep.
Kane ka jingsdang ka long ruh ban peit halor ka dor ka mur, ka ïew ka hat haba ïadei bad ka ‘Meghalaya brand’ ha Delhi, bad ban pynkhlaiñ ïa ka kam pynmih dud ne dairy, ki soh, bad ki jhur ju jhep ban ïoh ka dor kaba biang nalor kiwei ki bynta bad ïadei bad ki kam organic sector.
Na ka liang u Dr. Meenesh Shah, Chairman and Managing Director ka NDDB, u la ïaroh ïa kane ka jingïasoi MoU naba ka long kaba donkam bha.
“Kane ka jingïatreilang hapdeng ka Meghalaya State Agricultural Marketing Board bad ka Mother Dairy kan kyntiew ïa ka roi ka san bad kan pynbha ruh ïa ka jingpynmih ïa ki kam rep ha Meghalaya. Ngi long kiba kloi ban kyrshan ïa ki nongrep bad ban pynthikna ba kin ïoh ruh ka dor kaba bha ïa ki jingpynmih jong ki,” ong u Shah.
Na ka liang u Shah u la pynthikna ba ka NDDB kan bteng ban pynkupbor ïa ki nongrep ban pynïoh ïa ka ïew kaba bha bad ban kyntiew ïa ki jingpynmih na ka kam rep kam riang na Meghalaya.
Katba u Manish Bandlish, Managing Director of Mother Dairy Fruit & Vegetable Pvt Ltd, u la banjur ïa ka bynta jong ka NDDB ban pynïasoh ïa ki nongrep bad ki nongthied lyngba ka rynsan kaba dei.
U Bandlish u la kdew ruh ïa ka jingïashim bynta ki nongshong shnong ha ka Meghalaya pineapples ha Safal outlets ha Delhi bad pynbna ïa ka jingpyrkhat ban pynïar bad ban kynthup khambun jait kiwei ki marrep na ka jylla kum u sying, u shynrai Lakadong bad u GI-tagged Khasi Mandarin.
