Shillong, Nailar, 04: U Vice Chancellor ka North-Eastern Hill University (NEHU) u Prof. Prabha Shankar Shukla, u la shah jied biang kum u Executive Council member jong ka Association of Commonwealth Universities (ACU), United Kingdom. Kane ka jingshah jied jong u ka la long ka dak ka jingïaid lynti lyngba ki mawmer jong ka NEHU bad ka la paw mynta ba ka long ka jaka pule kaba ithuh ruh ha ka pyrthei.
Ka ACU, lyngba ki jingthmu jong ka, ka la leh ïa ki kam kiba kongsan bha haba ïadei bad ka pule puthi ha ka global higher education. Ki kam ba kongsan jong ka kidei ka jingïatreilang bad ka jingïasam ïa ki jingnang jingtip hapdeng ki dkhot ki skulbah, bad kiwei kiwei ki kam.
Ka ACU ka thmu ban pynbha ïa ka jinglong bad ka jingbha ha ka pule puthi bad ban pynsuk ha ki jingwadbniah ïa ki project, ka jingïasam ïa ki jingtip hapdeng ki samla pule bad kiba trei, bad kiwei ki kam babha. Kane ka jingïatreilang ka pynthikna ba ki dkhot ki jaka pule ki ïoh myntoi na ki riewshemphang ki ri ka pyrthei bad ka jingïalong ryngkat ha ka pule puthi ha kylleng ka Commonwealth.
Halor kane u Prof. Shukla u la banjur ki jingmyntoi na kane ka jingshah jied jong u ha kaba u ong ba kan wanrah ka jingbha ïa ka NEHU bad kiwei ki skulbah ka North East region.
“Ka jingshah jied jong nga kan long ka jingmyntoi ïa ka NEHU, ki college kiba pynïasoh bad kiwei ki university ha ka northeast region da kaba ïoh plie thymmai ïa ki rynsan ban ïadonbynta lang hapoh ki jaka pule ki ri ka pyrthei,” u la bynrap.
