Shillong, Nailar, 04: Ka Sorkar Assam bad ka Mizoram ki la pynlong ïa ka jingïakynduh lang ban ïamir jingmut halor ki lad ki lynti ba dei ban shim ha ka ban ïakhun pyrshah ïa ka kam khaïi drok bad jingdih drok.
Ha kane ka jingïalang la ïashimbynta da u Myntri ka Tnat Excise and Narcotics ka Mizoram u Lalnginglova Hmar bad u Excise Secretary ka Assam Indreswar Kalita bad Excise Commissioner Jitu Doley.
Ka jingkhaïi drok ha khappud ka dei kawei ka mat ba kongsan ba la ïakren ha kane ka jingïalang bad baroh artylli ki Sorkar ki la kut jingmut ban ïeng ïakhun tyngeh pyrshah ïa kane ka kam.
U Hmar ula ong ba u drok heroin ba la khaïi sha Assam na Myanmar u dei uba wan poi sha Mizoram hadien ba la dep saiñ biang ïa u.
U la pyntip ba ula ïohpdiang ïa ki khubor halor ka jingwan poi bun bah u drok heroin bad kiwei kiwei ki drok ha Assam bad ki nongkhaïi ki la ïoh shang laitluid hapoh ka Jylla.
Ki Ophisar ka Sorkar Assam ki la pyntip ha u Hmar ba kin sa shimkhia ïa kane ka kam bad kin sa ïakren bad u Myntri ka tnat Excise u Keshab Mahanta, uba dei ban wan ïashimbynta ha ka jingïalang hynrei u la pep namar ka jinghap beh ïa kiwei pat ki kam.
