Shillong, Nailar 04: Katba nangmih ki sngi la ïohi ba ka jingshah tuh jong kiba bun ki tiar ka la nang kiew manla ka sngi bad ha kaba ïadei bad kane katkum ka khubor ba la ïoh na ki pulit la ïathuh ba ka Kong Priska Ryntathiang ka la phah ka jingujor ba ha ka 29 tarik u Naitung ha ka por kumba 2 baje mynstep, ki runar bym lah ban ithuh ki la tuh ka pisa kumba T. 7,000/-, kumba 7 tola ka ksiar bad kawei ka mobile phone nalor kiwei pat ki tiar, ha kaba baroh ka jinglut ka la kot sha ka T. 5.64 lak bad kitei ki runar ki la tuh ïa kitei ki tiar napoh ka ïing jong ka kaba ha Pyndengnongbri (EWKH).
Shuh shuh ki pulit ki la ïathuh ba ha kawei pat ka jingjia ka Jarosh Marak ka la phah ka jingujor ba ha ka mied jong ka 29 tarik u Naitung, ki runar bym lah ban ithuh ki la tuh ïa ka scooter kaba don u nombar ML-07B-8608 napoh ka jaka sah jong ka kaba ha New Sarangma (NGH) bad ha kaba ïadei bad kane na ka liang jong ki pulit ki la ïathuh ba ka jingtohkit halor kine ki jingjia ki dang ïaid ban lap ïa ki runar kiba donkti.
