ïashim bynta ki nongai dawai kynbat na Meghalaya ha Arunachal Pradesh

0

Jowai, Risaw 02: Haduh 17 ngut ki nongai dawai kynbat ba kynthup 10 ngut na ri lum Garo bad 7 ngut na ri-lum Jaiñtia kila wan ïashim bynta ha ka jingïakynduh lang jong ki nongai dawai kynbat ka thaiñ shatei lam mih ngi ka ri India kaba la khot pynlong da ka North Eastern Institute of Ayurveda & Folk Medicine Research, Pasighat ha jylla Arunachal Pradesh.
Ïa kine ki 17 ngut la leit ban ïalam da u Dr. H. Carehome Pakynteiñ uwei na ki nongai dawai kynbat ba paw jong ka jylla uba dei ruh u President jong ka Meghalaya Indigenous Tribal Healers’ Association (MITHA) bad ha ka juh ka por u President jong ka Jaiñtia Indigenous Medicine Association (JIMA).
Kane ka jingïalang kadei ka ba la pynlong ha ka 27 bad 28 tarik mynta u bnai ha Pasighat jong ka Jylla Arunachal Pradesh ha jaka treikam ka NEIAFMR.
Ha kine ki ar sngi jong ka jingïalang la don ka jingai jinghikai pynsngewthuh sha ki nongai dawai kynbat, ka jingpyni paidbah ïa ki dawai kynbat bad ka jingbuh jingthoh ïa ki jait dawai kynbat bad ka rukum sumar bapher bapher kiba lah ban ïoh napoh kane ka thaiñ Shatei lam mihngi ka ri India (Northeast India).
Haba ïakren bad u Dr. H. Carehome Pakynteiñ hadien ka jingwanphai jong ki na katei ka jingialang, ula pynpaw ka jingsngewnguh ïa ka NEIAFMR kaba la ai jingtip sha u bad khot sngewbha ïa ki nongai dawai kynbat na ka Jylla Meghalaya ban ïadon bynta lang ha katei ka jingïalang. Ula ong ba na ka liang jong u kum u President ka MITHA ula ai jingtip sha ki dkhot hapoh ki District bapher bapher halor kane ka jingshah khot, hynrei kila don tang na Garo bad Jaintia Hills kiba la pynbeit ban leit ïashim bynta, namar na Khasi bad Bhoi kila pynpep.
U Dr. H. Carehome ula iathuh “Ka long ka jingmyntoi kaba khraw haduh katta katta ïa ngi kum ki nongai dawai kynbat ban ïoh ïashim bynta ha kane ka Workshop namar ngi ïoh shibun ki jingtip ïa ki dawai kynbat bad ïa rukom sumar da kaba ïathuh markylliang hapdeng kiwei pat ki nongai dawai kynbat na kiwei pat ki jylla jong ka thaiñ.
Shuh shuh ula ong ba ki don ki riew shemphang kiba la wan ba ai jingbatai ïa ha kine ki ar sngi kiba kynthup ïa u Prof. Darlando T. Khating, u Vice Chancelor ka North East Christian University, Dimapur Nagaland, na u Dr. Temin Payum, Associate Professor, Department of Botony, JN College Pasighat Arunachal Pradesh, Associate Prof. Dr. Kento Kadu, Asst. Prof Hari Loyi, Associate Prof. Dr. Mahesh Parappagoudra, Prof. B. Singh, Prof. Arun Kumar bad kiwei”.
Katba na ka liang jong ka jylla Meghalaya la ai jingkren da u Dines Marak na Tura bad na u Dr. H.C Pakynteiñ uba la ai jingkren halor ka phang “’Herbal Medicine’ The much needed remedy for all Preserve them”.
Ha ka sngi pynkut kala don ka jingsam ïa ki syrnod bad ki momento sha ki nongïashim bynta da u kongsan Prof. Darlando T. Khating, Vice Chancelor ka North East Christian University, Dimapur Nagaland.

Leave A Reply

Your email address will not be published.