Pynlong prokram pynshai paidbah ka MPA halor ka phang “Ka jingpynjulor ïa ka Mariang”

0

Shillong, Risaw : Ka Meghalaya Pensioners’ Association Shillong (Central Body) ha ka 29 tarik u bnai ba la dep kala pynlong ïa ka prokram ba kyrpang halor ka phang, “Ka jingpynjulor ïa ka Mariang,” hapoh Dorbar Hall Neng Gate Pynursla shibynta ban pynshai paidbah halor ka jingshyrkhei ka jingpynjulor ïa ka mei mariang.
Ka jingpynlong ïa kane ka prokram ka long ruh shibynta ban burom ïa ka jingïaid lynti ban rakhe ïa ka jingdap 50 snem ka jingïoh ïa ka jylla Meghalaya ba pura.
ïa kane ka prokram la pynlong ha ryngkat ka jingïatreilang I Kong EL Warjri, MCS SDO (Civil) Pynursla Civil Sub Division, Pynursla, Meghalaya Pensioners’ Association, Pynursla unit, ki Rangbah Shnong, Rangbah Dong, Chairman ka Raid Shabong, Sordar, ki skul bad ki kolej nalor ki dkhot bala shongthait baroh hapoh ka thain Pynursla.
Ha kane ka prokram ba la pynïaid da u Bah M. Syrti, Working President MPA Shillong la ïa don lang ruh u General Secretary, Treasurer nalor ki dkhot jong ka MPA bad kiwei kiwei.
Ha kane ka sngi I Kong EL Warjri, MCS SDO (Civil) Pynursla I la long I Resource person halor katei ka phang kaba ïadei bad ka jingpynjulor ïa ka mariang.Ha kaba nyngkong ila ai ka jingkren halor ka jingpynjot ïa ka mariang khamtam ha ka dong Pynursla.
I la ong ruh ba ki don ki jingjia kiba la poi ha kaba kut kum ka jingsawa, ka jingpynwit, ka sla pyrthei, ka um kaba don hapoh khyndew, kum ki jingtyrkhong um, jumai, ka jingshlei um, ki jingtwa ki lum ki them bad ka ‘erïong kaba jur kiba la pynlong ïa ki jingdon jingthaw ha ka mariang ba kin shah pynjot pynpra.
Nalor kata I la ong ruh ba kila don haduh kumba laispah tylli ki jingjia shah pynjulor mariang kiba ju jia man la ka snem ha ka pyrthei, bad da ki lak, ki phew lak bad da ki hajar klur kila hap ban pynlut ïa ka pisa.
Ka tynrai halor kine ki jingjia shah pynjulor ka long namar ba ki briew ne sorkar kim pat peit bniah bad don ka jingkitkhlieh ïa kine ki jingjia.Ki don ki jingjia kiba tang malu mala bad ki don pat ki jingshah pynjulor kiba ktah ïa ki jaka hapoh ki shnong ki thaw.
Ki katto katne ki daw kiba lam sha ka jingshah pynjulor jong ma mei mariang ha kane ka thain kilong lyngba ka jingpluh ding kiba ju jia khlem da tip mano mano ruh, k jingkhie cyclone kaba kaba la ktah lyngba ka lyer duriaw jong ka Bay of Bengal, ki jingtwa ki lum ki wah hapoh ka shnong Pynursla kaba long kawei na ki thaiñ kaba tap da ki lum ki wah bad haba jur slap ka ju wanrah ki jingtwa ki lum ki wah bad ki lynti ki syngkien kaba la ktah jur ruh ha kaba ïadei bad ka leit ka wan.
Ka jingshlei um kaba ju wan jia namar ka jingther jong u slap kaba ktah khamtam ïa ki nongshong shnong kiba shong ba sah ha ki thaiñ kiba don ïa ki wah lane ki jaka them bad ki jingpynjulor kiba wan lyngba ki kshaid kiba wan na ki wah kiba ju kit ïa ka um bad khyndew kiba wanrah ka jingjulor ïa ka mariang.Kane ka long katkum u kyrwoh lyngba u General Secretary ka MPA Central Body, Shillong.

Leave A Reply

Your email address will not be published.