Da ka jingïakob ïa tyrko pynlong ka TMC Student’s Union na bynta ki College

Shillong, Risaw 02 : Bun tylli ki college ba don ha ka nongbah ki la shim bynta ha ka jingïakob ïa tyrko ba la pynlong da ka Trinamool Congress Student’s Union halor ka phang, ‘Hato ngi la laitluid shisha hadien ki 75 snem ba ngi ïoh jinglaitluid,’ kaba la pynlong ha Don Bosco Hall Laitumkhrah.
Ha kane ka rynsan ïa kob ka kynhun jong ki samla na Raid Laban College ki la ïoh ban khur ïa ka nam lahduh bud pat sa ka Synod College ïa ka kyrdan kaba ar bad ka Shillong Law College ïa ka kyrdan kaba lai.
Ki college kiba wan ban shim bynta ha katei ka jingïakob ki kynthup naduh St. Edmund’s, Lady Keane, Synod College, IHM Shillong, St. Anthony’s bad ruh na Shillong Law College.
Ïa katei ka rynsan ïakob la wan ban pynhap pyrda noh da ka kyrtong ka TMC na Shillong North Kong Elgiva Rynjah kaba la ai ka jingïaroh ïa ki samla TMC kiba la lah ban pynlong ïa kum kitei ki lympung ba tip kum ka ‘Winds of Change festival’ ha kine ki lai sngi ba la dep.
Na ka liang u President jong ka TMC-SU, samla Bansharai Pyngrope u la ong ba katei ka sienjam ka long ban ailad ïa ki samla ka jylla lyngba ki samla pule ban pyni bad sdang ïa ka jingkylla.
Ha ki ar sngi ba la dep, ka la don ruh ka jingpynlong ïa ki lympung ïalehkai kum ka jingïakob tan tyllai, ka table tennis, ïakob pyni riam bad ruh ka ïakob rwai. Ha ka 29tarik ïa katei ka lympung la wan ban plie da u State Vice President ka TMC Bah James Lyngdoh bad MLA ka TMC ka Miani D Shira.
Ha ka 30tarik pat, u President ka TMC Bah Charles Pyngrope u la wan ban donlang kum u Kongsan uba la banjur ïa ki samla pule ba kin don ka jingkitkhlieh ban pyni kaei kaba bha ha ka imlang sahlang.