Nongpoh, Rymphang 20: Ka Ri Bhoi Youth Federation (RBYF) Sengkmie mynta ka sngi ka la mih shakhmat ban ai ka jingïaroh kaba khraw ïa u MLA ka Umsning, u Dr. Celestine Lyngdoh, kaba dei halor ka nongrim ba kum u nongmihkhmat paidbah u la pyni ïa ka jinglong nongmihkhmat ban dawa syndon na ka sorkar ba ka dei ban ai noh ïa ka madan Artificial Turf ha Ri Bhoi District.
Kane ka jingïaroh ka RBYF ïa u MLA ka Umning, u Dr. Celestine Lyngdoh, ka dei hadien ba mynta ka sngi ha ka dorbar mang tyngka ha ïing dorbar thaw aiñ, u la la mih shakhmat ban kren bad ban dawa mardor na ka sorkar MDA-2 ba ka dei ban phai khmat kyrpang sha ka Ri Bhoi ban ai noh ïa ka madan Artificial Turf ha Ri Bhoi, nalor kiwei kiwei ki jingdawa kiba u la kren na ka bynta ka dong Ri-Bhoi.
Haba ïa kren bad u President ka RBYF, u Bah Bipul Thangkhiew, u la ong ba kum ka seng kaba ïeng ban shakri na ka bynta ka jingmyntoi ki paidbah ha Ri Bhoi ka sngewsarong ban mih kum une u nongmihkhmat uba nud ban kren ïa ki jingdonkam ka District bad kumba u la pynpaw da kaba dawa ïa ka madan Artificial Turf ha Ri Bhoi la da kam dei ha Umsning ba u don ha ka liang pyrshah, la dei ban ai ha madan Kurkalang ne ha Nongpoh ba don ki MLA kiba don ha ka sorkar, la dei ban ai jingïaroh kaba khraw ïa u kum u MLA uba kren shisha na ka bynta ka jingmyntoi ki khun samla.
U la ong ruh ka seng RBYF ruh ka mynjur ïa ka jingdawa u MLA ka Umsning ba la dei ban don noh ka madan Artificial Turf ha Ri Bhoi, namar kumba long ha ka jylla, ka Ri Bhoi District ka dei kawei na ka District kaba pynmih shibun ki khun samla ba don sap ha ki kam ïalehkai sport bad kumba dang shen ruh ha ka Khelo India bad wat ha ka Meghalaya Game kiba bun na ki samla na Ri Bhoi ki la wan rah ïa ka burom ïa ka jylla da kaba khur bun ïa ki nam jop kaba long ka burom ym tang ïa ka Ri Bhoi bad wat ïa ka jylla hi baroh kawei.
“Ka Ri Bhoi ka la donkam shisha ban don noh ka Madan Artificial Turf ban kyntiew ïa ki khun samla ha ki kam ïalehkai sport bad nalor ka madan Artificial Turf ka Ri Bhoi ka la donkam ruh ban don noh ka Multi Sport Complex kaba dei kawei na ka lad ban kyntiew shisha ïa ki samla ka Ri Bhoi kiba don sap ha ki kam ïalehkai sport” ong u Bah Bipul Thangkhiew, bad bynrap ruh kum ka seng ka ai jingïaroh ïa u MLA ka Umsning uba la kren ïa kane ka phang ka jingdonkam ki samla bad kumba la pynpaw da u MLA ka seng ka kloi ba pdiang ba ka sorkar ka dei ban wan rah noh ïa ka madan Artificial Turf la ka long ha kano kano ka bynta jong ka Ri Bhoi District” u la bynrap.
U la kren shai ruh da kaba ong ba ka Ri Bhoi District kaba ju pynmih bun ki rang bad ki thei ïalehkai sport kiba la wan rah burom ïa ka jylla ka la donkam ban don noh kawei ka Multi Sport Complex khamtam ka Madan Kurkalang kaba don ha syndah ka Umroi Airport ka la don hok ban ioh shuwa ïa ki Stadium kiba paka bad ba la ju pynsngew ruh sha ka sorkar la slem bah, hynrei kaba sngewlyngngoh pat ba ki stadium ki poi shwa sha Ampati bad sha Tura ban ïa katei ka madan Kurakalang kaba la don hok shisha ban ioh ïa ki stadium kiba paka, u la bynrap.
Shuh shuh, ha kawei ka bynta, ka RBYF ka ai jingaroh ruh ïa u MLA ka Jirang Constituency, uba la shim khia ban pynioh ïa ka Mini Stadium ha Byrnihat kaba ki dang pyntrei shaid shaid mynta bad kane ka jingioh ïa ka Mini Stadium ha Byrnihat ka long shisha ka jingkyrkhu ïa ki khun samla ha ka thaiñ Byrnihat bad ha ka Ri Bhoi hi baroh kawei.
