Ïaroh ka HYC ïa ka sorkar halor ka jingpdiang ïa ka ktien Khasi hapoh ka CBSE Curriculum

Shillong, Jymmang 24: Ka Hynñiewtrep Youths’ Council (HYC) kala ïaroh bad ai khublei kyrpang ia ka Sorkar Meghalaya halor ka jingithuh paidbah ïa ka Ktien Khasi kum ka Official State Language bad halor ka jingpdiang ïa ka hapoh ka CBSE Curriculum.
“Kane ka long ka jingjop kaba khraw ha ka jingïada, jingïarap ban kyntiew bad ban pynkhlaiñ ïa ka ktien, ka kolshor bad ka jinglong tynrai jong ngi” la ong u President ka HYC u Bah Roy Kupar Synrem ha ka kyrwoh khubor ha ka Sngi U Blei.
Ka HYC ka ngeit skhem ba ka ktien kam dei tang ka lad jingïakren hynrei ka long ka nongrah ïa ka histori, ka kolshor bad ka jingangnud jong u paidbah. Kane ka jingithuh ka dei u soh jong ki bun snem ki jingtrei shitom bad ka jingnoh synñiang jong ki riewstad, ki nongïaleh na ka bynta ka ktien, ki nongthoh kot, ki seng trei mon sngewbha bad ki nongshong shnong kiba la trei minot ban pynthikna ïa ka jingroi bad ka jingneh jong ka Ktien Khasi.
Na ka liang ka seng ka la ong, “Katba kane ka jingithuh kadei ka bynta kaba pynkmen bad kaba la angnud la slem, hynrei ka HYC ka sngew skhem ba ym dei ban peit ïa kane kum ka jingpoi sha ka jingïaid lynti kaba khatduh. Ka bynta kaba bud bad kaba kham kongsan ka long ban pynthikna ïa ka jingkynthup ïa ka Ktien Khasi hapoh ka Khyrnit Ba Phra jong ka Riti Synshar Ka Ri India. Kane ka jingithuh hapoh ka riti synshar ka ri kan ai jingïada bad jingithuh kaba kham khraw ïa ka ktien bad kan plie ruh shibun ki lad ha ka pule puthi, ka synshar paidbah, ka thoh ka tar, ka jingwad bniah bad ha ki jingïakhun eksamin kiba long ha kaba kham hajrong ha ka ri.”
Ka HYC ka kyntu ïa ka Sorkar Meghalaya ban buddien tyngeh ïa kane ka kam bad ka Sorkar India bad ki bor ba dei peit khnang ba ka Ktien Khasi kan ïoh ïa ka jaka kaba dei hok jong ka hapoh ka Khyrnit Ba Phra ka Riti Synshar Ka Ri India.
Shuh shuh utei u nongïalam ka HYC ula pynpaw ba ka Sorkar Jylla ka dei ban shim ïa ki sienjam kiba paka ban pynthikna ba kane ka jingangnud kaba la slem jong ki paid u Hynñiewtrep kan urlong noh kham kloi bad ka HYC kan ïai bteng ban ai ka jingkyrshan ïa kino kino ki sienjam kiba thmu ban ïada, ban pynneh bad ban pynkhlaiñ ïa ka ktien tynrai na ka bynta ki pateng ban wan.