Ïarap ka DIPR ban pyntip ïa ki paidbah halor ki skhim bapher bapher, ïathuh ka Myntri IPR

Shillong, Lber 06: Ka Directorate of Information and Public Relations (DIPR), ka sorkar jylla ka la pynlong ïa ka Conclave halor ka “Emerging Trends in Public Communication – Redefining the Role of DIPR” hapoh State Convention Centre, Shillong.
Ha kane ka prokram ka Dr. M Ampareen Lyngdoh, ka Myntri kaba khmih ïa ka tnat IPR ka la wan ban ïashim bynta kum ka kongsan, katba u Dr. Shakil P. Ahammed, Additional Chief Secretary u la long u symbud kongsan bad ka kong Patricia Mukhim, Editor ka The Shillong Times kum ka special guest. Ha kane ka prokram la wan ruh ban shim bynta lang da u Vijay Kumar Mantri, Commissioner & Secretary, IPR, u Bah B.S. Sohliya, Secretary & Director of I&PR, bad kiwei ki heh ophisar ka tnat DIPR.
Haba kren ha kane ka sngi na ka liang ka Dr. M Ampareen Lyngdoh, Myntri ka tnat IPR, ka la banjur halor ka jingdonkam ka tnat Directorate of Information and Public Relations (DIPR) ban pynthikna ba kan dei ban don ka jingïadei kaba jan hapdeng ka sorkar bad ki nongshong shnong.
Ka la bynrap da kaba ong, “Donkam ban batai bha ïa ka kam bad ka bynta jong ka DIPR. Ha kane ka juk kaba mynta donkam ïa ka tnat ba kan shim ïa ki lad ki lynti kiba thymmai kaba ïaid lang bad ki jingkylla jong ka por, da kaba pynthikna ruh ba ki jingsdang bad ki skhim kiba ka sorkar ka la sdang ka dei ban poi sha ki paidbah.”
Na ka liang ka Myntri ka la pyntip ruh ba ka kamram jong ka DIPR ka dei ban ai jingtip ïa ki nongshong shnong shaphang kiba bun ki skhim kiba don bad ki. “Haba ïa kine ki skhim la lah barabor ban ïohi, ka bor kaba khlaiñ jong ka DIPR ka dei ban ïohi ïa ki jinglah jong ka ban pyntip kiba ïar ha ki bynta bapher bapher. Kam da dei than tang kaba ïohi, hynrei shaphang ka jingpynthikna ba ki khubor la ïohpdiang da ki nongshong shnong, bad kidei ruh ban sngewthuh ïa kine ki khubor,” ka la kynthoh.
Ka Dr. Lyngdoh ka la banjur ruh halor ka bynta kaba kongsan jong ka DIPR. “Ngi don ka jingkitkhlieh ban sam ïa ki lad jingtip, ban pynkupbor ïa ki nongshong shnong da kaba ai ha ki ïa ki jingtip shaphang kiba bun ki scheme kiba ki nongshong shnong kidei ban ïoh,” ong ka kong Ampareen.
Ka la ïathuh ruh halor ki kam kiba khraw ba ka DIPR ka la leh ha kiba bun ki liang, khamtam ha kaba ïadei bad ka jingwanrah ïa ka khuid ka suba, ka jingbiang ka jingkheiñ jingdiah bad ka jinglah ruh ban pynkhring ïa ki nongshong shnong ha kiba bun ki prokram jong ka sorkar.