Hadien ka MP elekshon shiteng samoi yn rai la yn dang pynneh ne pynduh noh ïa ka RDA

Shillong, Nailar 18 : U General Secretary jong ka UDP, u Bah Titostarwell Chyne ha ka sngi Ba-ar u la ong ba ka UDP bad HSPDP kin sa shong ïakren biang hadien ka MP By-election ban rai halor ka jingïaid lynti jong ki hapoh ka lama Regional Democratic Alliance (RDA).

“Hadien ka MP By-election, ngin pynlong ïa ka jingkynduh lang hapdeng ka HSPDP bad UDP. Ngin shong lang bad  ïakren ïoh ka don kano kano ka jingïapher jingmut ne ka jingbym sngewthuh bha, bad ngin rai lada ngin bteng ne ngin pynkut noh ïa ka jingïatreilang,” ong u Bah Titos haba kren bad ki lad pathai khubor.

U la ong ba ka HSPDP kam pat ai kano kano ka jingpyntip da  ka jingthoh sha ka UDP, hynrei ka party ka la pynpaw paidbah ïa ka rai jong ka.

Haba kren pat halor ka mat ïatrei lang jong ki na bynta ka elekshon MP shiteng samoi u Bah Titos u la ong, “Kim pat ai jingthoh sha ngi, hynrei ki la pynbna paidbah ha ka jingkren jong ki ba kin ym kyrshan ïa uno uno ne kano kano ka party.”