Shillong, Lber 06 : Ka sorkar jylla ka la mang haduh 10 klur tyngka na ka bynta ban shna sa 35 tylli ki jaka pynmih symbai dohkha ban kyntiew ïa ka jingpynmih dohkha ha ka jylla.
Haba jubab halor ka jingkylli ha Iing Dorbar ha kane ka sngi Palei, u Myntri Rangbah u la ong, “Ka kam kan sa sdang noh shen bad hadien ba la dep ïa ka jingshna, ka jylla ka sa don haduh 96 tylli ki jaka pynmih symbai dohkha.”
Shuh shuh u la ong ruh ba haduh mynta hi, ka jylla ka la don 61 tylli ki jaka pynmih symbai dohkha kiba lah ban pynmih kumba 24.7 million tylli ki symbai dohkha.
U Myntri Rangbah u pyntip ruh ba ka jingpynmih dohkha ha ka jylla ka la kiew mynta sha ka 20,000 to ha ka shisnem na ka 4,000 ton kaba ju don baroh shi katta ha shwa ban pyntreikam ïa ka aqua culture mission.
“Hynrei, naba ka jingdonkam dohkha ha ka jylla ka poi haduh 32,000 ton, ka jylla ka hap ban wanrah shuh na shabar jylla sa kumba 12,000 ton,” u la ong da kaba bynrap ruh ba shen ka sorkar kan sa pyllait paidbah ïa ka aqua culture mission kaba thymmai.
Katkum ka jingong jong u, kane ka Mission kan donkam kumba 4000 hectare ka jaka ban pynlong ïa ka jylla ba kan lah ban pyndap dohkha hi dalade ïalade.
Nalorkata, u Myntri Rangbah u la pyntip ruh ba haduh 778 ton u jingbam la hap ban thied na ka jingdonkam kaba long 30,000 ton. “Ka sorkar ka la mang pisa na ka bynta ban shna shuh sa 12 tylli ki karkhana shna jingbam dohkha bad ruh ban kyntiew kyrdan ïa ki 17 tylli kiba la don lypa,” u la ong.
Shwa kane, u Myntri Rangbah u la pyntip ruh ba la dep ban shna haduh 3230 tylli ki pung dohkha na ki skim bapher bapher naduh u snem 2020 haduh u snem 2024 ha ka jingmang kaba la kot sha 9768.29394 klur tyngka.
