Shillong, Lber 06: U nongïalam ka Voice of the People Party (VPP) u Bah Ardent M Basaiawmoit ha ka sngi Palei u la ong ba ka jingbuh bun ïa ki karkhana ha Byrnihat, kaba la shah kdew ba ka dei ka thaiñ kaba la jaboh tam ha India kan long ka jingma ïa ki briew kiba im ba sah ha kane ka thaiñ baroh kawei.
Haba ïashim bynta ha ka jingïatai kaba lyngkot ha kaba ïadei bad ka jingtyrwa ban pynkylla ïa ki jaka khlaw sha ki jaka ban buh ïa ki karkhana ha Byrnihat da ka sorkar jylla, u Bah Basaiawmoit u la ong ba ki briew na ki shnong bapher bapher ki wan lang ban pynpaw ka jingpyrshah ïa kane ka jingthmu jong ka sorkar ban buh da ki karkhana ha kine ki thaiñ.
U la pyntip ruh ba ha ka jingleit jurip kaba dang shen da ka party bad la shem ba ki dangdon bun ki dieng ha kane ka thaiñ.
“Lada ka sorkar ka pynkylla noh ïa kine ki jaka sha ki jaka ban buh ïa ki karkhana kan long kaba suk ban sngewthuh ba ka sorkar kan hab ban pom ïa ki dieng bad pynsyllen ïa ki lum naba donkam ban buh ïa ki karkhana ha kine ki jaka. Kumta ngi sngew ba ïa kane ka kam dei ban pynbeit noh kloi,” ong u Bah Basaiawmoit.
Haba ong ba ka VPP kam dei kaba pyrshah ïa ka roi ka san, u MLA ka Nongkrem u la ong, “Ngi kwah ban ïohi ïa ka roi ka san hynrei kam dei pat ban long da kaba pynjot ïa ka sawdong sawkun bad ki lad jingïada ïa ki briew kiba im ha kine ki thaiñ.”
“Nga kyrmen ba ka sorkar kan wad da kiwei ki lad ki lynti kaba dei ban ai ka jingïada ïa ki paidbah bad kumjuh ruh ïa ka thaiñ hi baroh kawei. Sngewbha ïada ïa kane ka jaka bad kumjuh ruh ïa ki jingmytoi ba ïoh na kane ka jaka khamtam kaba long seisoh ha ka rep ka riang bad ka kam rep soh ha kaba ka jingheh kane ka jaka ka long palat 1400 acre kumta ka dei ka jaka kaba heh bha bad donkam ïa ka sorkar ba kan ïarap ïa ki briew kiba sah ha kane ka thaiñ,” u la bynrap.
