Shillong, Nailur 13 : Haba pdiang sngewbha ïa u MLA barim ka Nongthymmai, Bah Jemino Mawthoh, sha ka BJP ha ka Sngi Saitjaiñ, u nongïalam rangbah ka seng bad MLA ka Pynthorumkhrah, AL Hek, u la ong ba u la pyrshang ban khroh ïa u Jemino sha ka BJP naduh u snem 2021.
U Bah Hek u la batai ruh ïa u Bah Jemino kum u briew uba don ka nongrim kaba skhem bad uba burom ïa ka jinglong briew jong baroh.
“Mynta, ha ka kyrteng jong ka BJP, ngi pdiang sngewbha ïa u Bah Jemino Mawthoh,” u Hek u la ong.
U la ong ba u la pyrshang bunsien ban pynrung ïa u Bah Mawthoh sha ka BJP shuwa ka elekshon 2023.
“Nga la ïakren bad nga la bud ïa u Bah Jemino naduh u snem 2021. Nga la leit sha ïing jong u bunsien ryngkat bad u nongïalam ka BJP ba peit ïa ka Meghalaya ban pynsngewthuh ïa u ba un ïakhun ïa ka elekshon 2023 na ka BJP. U Bah Jemino u don ka jinglong kaba bha, u dei u riewshynrang uba nga lah ban ïeng sakhi na ka bynta jong u,” u la ong.
U Bah Hek u la ong ba ka rai jong u Bah Mawthoh ban shong jar bad ban ym rung sha kano kano ka seng saiñpyrthei la bun bnai hadien ba u la iehnoh ïa ka UDP, ka pyni ïa ka jinglong jong u.
“Shuwa ban rung sha kano kano ka seng saiñpyrthei, u la iehnoh ïa ka UDP bad u shong jar la bun bnai. Kata ka pyni ba u dei u briew uba don ka nongrim. Um kwah ban shukor ne pynsngewsih ïa uno uno. U kwah ban ïeng kum u briew uba don ka nongrim bad ka jinglong kaba bha. Uta u dei u Dr Jemino Mawthoh,” u la ong.
U Bah Hek u la kynmaw ruh ïa ka jingïadei jong u bad u Bah Jemino naduh ki por samla, ha Seng Samla Shillong.
“Nga la ïadon lang bad u Bah Jemino naduh ba ngi dang samla. Nga la ïohi ïa u haba u trei bad bun tylli ki seng bad ki kynhun. U long uba kham kongsan ban ïa ki degree jong u bad ban ïa ka kyrdan jong u. Kaba nyngkong eh kaba u sngewthuh ka long ka jinglong briew. Ka jinglong briew ka dei kaei kaba khraw tam ha u Bah Jemino, bad u shakri ïa ki briew baroh khlem da jied. Kata ka long kaba kongsan ha ka jingim jong ngi mynta,” ong u Bah Hek.
Shuh shuh u la ong, “Ka niam jong nga kam long kaba kham halor ïa nga, ka kyrdan jong nga kam long kaba kham halor ïa nga, bad ka degree jong nga ruh kam long kaba kham halor ïa nga — halor jong kine baroh ka long ka jinglong briew. Lada phi tip kumno ban burom ïa ka jinglong briew, kata ka long kaba kongsan. Ym dei namar ba nga dei u Khristan ba phi mut tang ki Khristan kin leit sha bneng. Lada phi tip kumno ban shakri ïa ki briew, kata ka long ka lynti kaba bha tam, watla phi dei na kano kano ka jaitbynriew ne kano kano ka niam.”
Haba kren halor ki jingkylla ha ka saiñpyrthei ha kine ki sngi, u Bah Hek u la ong ba bun ngut ki MLA kiba dang don ha ka kam ki la rung sha ka BJP, bad u la pynpaw ba ka thong jong ka seng ka long ka elekshon 2028.
“Ngi la ïohi ïa ki jingjia kiba dang shen — bun ngut ki MLA kiba dang don ha ka kam ki la rung sha ka BJP. Ka thong jong ngi ka long u snem 2028. Kynmaw bha, ha u snem 2028 kan don ka sorkar ha Meghalaya ka ban ïalam da ka BJP. Ngi la shim ïa kane ka kular. Bun ki jingjia kin dang wan ha ki sngi ban wan, hynrei ngi hap ban trei shitom bad da ka jingshisha khnang ba ha u snem 2028 ka sorkar kan long kaba ïalam da ka BJP. Lada baroh ngi trei shitom, ngi ngeit skhem ba ngin lah ban pynurlong ïa kata,” u la ong.
U la ong ruh ba baroh ki karyakartas, naduh ki nongtrei ha trai haduh ki nongïalam jong ka jylla bad ka ri, ki dang peit sha ka elekshon 2028 bad ka sorkar kaba la ïalam da ka BJP.
“Mynta ngi hap ban shim ïa ka jingkitkhlieh, uwei pa uwei, ban pynthikna ba ha kano kano ka constituency ba phi dei, ngi pynkhlaiñ ïa ka seng khnang ban ïoh bun ngut ki MLA. Ha ka saiñpyrthei, ka jingbun ki number ka long kaba kongsan. Ka seng ka don, hynrei haba ngi ïoh ka jingbun kaba biang, hangta ngin lah ban ong ba ngi lah ban thaw sorkar ha Meghalaya,” u la ong.
