Shillong, Lber 06: U Myntri Rangbah ka jylla u Conrad K Sangma ha ka sngi Palei u la pyntip ba ka sorkar jylla ka la shim ïa ki lad ki lynti kaba donlang bad ka master plan na ka bynta ban pynkylluid ïa ka nongbah Shillong.
“Kane ka dei shi bynta na ka Shillong Urban Mobility Policy,” pyntip u Conrad haba jubab ha ki kynta jingkylli hapoh ka dorbar mang tyngka ha kane ka sngi.
Katkum ka jingong jong u, ka jingïada ka long kaba donkam eh hakhmat, ka jinglong jong ka surok, ka jingdon ki jaka pynïeng kali bad ki lynti ïaid kjat ki long kiba donkam bha ban kynthup ha kane ka policy.
Halor ka jingkylli ba la wanrah da u Dr. Mukul Sangma halor ka jingdonkam ban wanrah ïa ki lad jingïada ha ki surok u Myntri Rangbah u la ong, “Ngin shim khia ïa baroh ki liang bad ngin ym ieh ruh ïa kano kano ka kam kaba ngi dei ban pyndep.”
U Myntri Rangbah u la pynbna ruh ba 30 percent jong ki surok kin dei kiba ym shah ban ïaid kali bad ka sorkar jylla ka thmu ban pynbun ki lynti ba ïaid da ki paidbah ne ki lynti ïaid kjat.
“Baroh ki nongshong shnong kin mynjur ba ka dheng kali ka la wanrah ka jingeh kaba khraw bad dei halor kane ba ka sorkar ka la shim ïa ki sienjam ban pynduna ïa kane ka jingeh,” ong u Conrad da kaba bynrap ruh ba ki la don haduh 1200 tylli ki parking lot kiba la shna bad mang da ka sorkar.
U la pynthikna ruh ba ka sorkar ka la peit bniah ha kiba bun ki liang la ka dei ha ki kyndon bad kiwei ki bynta.
U Myntri Rangbah u la pyntip ruh ba ka sorkar ka la shim ïa ki lad ki lynti ha kaba ïadei bad ki jaka pynïeng kali ha ki surok ne ki street parking policy.
Kham ha shwa haba jubab ïa ka jingkylli ba la wanrah da u MLA ka VPP na Mawlai u Bah Brightstar Marbaniang, na ka liang u Symbud Myntri Rangbah uba khmih ïa ka transport u Bah Sniawbhalang Dhar u la ong ba ka project jong ka jingai rong hapoh bad sawdong ka surok main secretariat kadei lyngba ka Indian Road Congress (RIC):86-2018 – Geometric Design Standards for Urban Roads and Streets.
U la ong ba kane ka project la shim na ka bynta ban pynduna ïa ka dheng kali kaba don ha sawdong jong kane ka thaiñ baroh kawei.
U la ïathuh ruh ba ka la don ka jingkhmih bniah na ka bynta ban shim ïa ki lad ki lynti ban pynkylluid ïa ka nongbah Shillong.
