Tura, Kyllalyngkot 7: Ka jingïania hapdeng ki nongdie kwai ka la lam sha ka jingïashoh ïadat ha kaba uwei ula khlad noh ha katei ka jingjia, kaba la jia hynne ka sngi Baar, ha Supermarket kaba don mar pyrshah bad ka MTC Bus Stand ha Tura. Utei uba la khlad u dei u Jaha Uddin uba dei u kni namar u shah dung ha u pyrsah u Minurul Islam.
Katkum ka khubor na ki pulit, kila ïathuh ba katei ka jingïania bad jingïashrut ka la sdang ha ka por kumba 11:32 mynstep bad kane ka jingïania kala nang khluit bad kala mih syndon ka jingïashoh ïadat.
Ha katei ka jingjia, uwei u nongdie ula shah dung da ka wait tukri bad ula mynsaw jur bha ha ka bynta jong ka kpoh.
Ki ar ngut ki briew kiba la ïashoh ïadat la tip kyrteng kum Minurul Islam, 24 snem ka rta bad u Jaha Uddin kiba dei shi Kni shi Pyrsa bad kiba shong basah ha Risipara ha Tura.
ïa u Jaha Uddin uba la mynsaw jur, la pynkit noh mardor sha Tura Civil Hospital hynrei ula khlad noh namar ka jingjur palat jong ka jingmynsaw hashwa ba yn ïoh ïa ka jingsumar.
Ki Pulit kila poi mardor ha katei ka jaka bad kila kem noh ïa u Minurul Islam bad kurup ruh ïa ka wait tukri kaba ula pyndonkam ha ka jingïashoh ïa dat.
Ki pulit ki dang pynlong ïa ka jingtohkit ban lap ïa ka daw tynrai halor katei ka jingjia kaba la pynlong ba kin ïa shoh ïa dat bad poi syndon sha u pud ban duh ïa ka jingim briew.
