New Tehri, Ïaiong 12 : Ki la don haduh san ngut ki briew na kawei ka longiing kiba la ngam jyllop hadien ba ka kali SUV ba ki shong ki la hap sha ka wah ha Tehri district jong ka Uttarakhand ha ka step jong ka Sngi Saitjain.
Ki bor sorkar na katei ka jylla ki ïathuh ba katei ka Mahindra Thar kaba kit hynriew ngut ki briew ka la kylla noh hajan ka shnong Bagwan ha Badrinath National Highway ha ka por 6:00 baje mynstep bad hap sha ka wah Alaknanda, ong u Devprayag Station House Officer u Mahipal Singh Rawat.
Ha kane ka jingjïa ka State Disaster Response Force ka la ïoh ban pyllait im noh ïa kawei ka longkmie.
Katkum ka jingïathuh da utei u heh sorkar, la ong ba kane ka longiing ki dei na Faridabad bad ki don ha lynti ban leit sha kawei ka jingkhawai ïathoh shongkurim ha Gauchar ha Uttarakhand kaba hap ha Chamoli District hynrei ki la kynduh pynban ïa katei ka jingjia ba sngewsih.
Ïa kine kiba khlad la tip kyrteng kum u Sunil Gusain (44), ka kurim jong u ka Meena, bad u khun ba dang 14 snem bad ka khun kynthei pat ba dang 12 snem. Uwei pat u lanot ba ngat lang ha katei ka jingjia dei u khynnah ba dang 16 snem.
Ka kmie jong u Aditya ka Anita kaba la lait im na katei ka jingjia ka la don hapdeng ka jingmynsaw kaba jur.
Ïa ka kali ha kane ka sngi la niah da u Sunil Gussain, la ïathuh utei u ophisar.
Kine ki shijur bad arngut ki khun ki dei ki nongshong shnong jong ka Sainik Colony ha Faridabad katba u Aditya pat u dei uba sah ha Durga Colony ha Roorkee.
Ïa ka met jong kine ki la ïoh ban sei noh hadien ka jingwad kaba la slem bha ha ka wah Alaknanda da ki nongngam um kiba tbit na ka SDRF ryngkat ka jingdonlang lang ki pulit.
La ïathuh ba ïa ka met jong kine ki lanot la phah sha ka Base Hospital ha Srikot da ka kali kit nongpang jong ka sorkar.
