Watla ka kñia kam don shuh, ki kolshor, bad ki riti dustur ki riewspah hapoh ka Raid Nonglyngdoh

Nongpoh, Ïaiong 12: Sa shisien pat ki khun ki hajar jong ka Raid Nonglyngdoh ki la kiew biang sha ka Lawkyntang jong ka Raid kaba don haka shnong Mawjong Ri-Bhoi District, ban sakhi ïa ka tamasa Shad Sajer kaba 17 jong ka Raid Nonglyngdoh, ryngkat ka jingriewspah jong ka kolshor, ka riti dustur bala buh naduh u mynbarim.
Watla ka kñia ka khriam kam don shuh hadien ba bun na ki khun ki hajar ki la kylla khristan, hynrei lyngba katei ka tamasa ki nongïalam hapoh ka raid ki dang pynneh bad pynim pat ïa ka riti ka dustur, ka deity bad ka kolshor tynrai kumba la buh da u longshuwa man shuwa.
Ïa katei ka tamasa la wan ruh ban shim bynta da u Bah Sosthenes Sohtun MLA ka Jirang ba dei ruh u Chief Whip ka sorkar Meghalaya kum u kongsan, haka jingdonlang ka kong Rona Khymdeit MDC ka Nongpoh, u Bah Sensy Lyngdoh, Lyngdoh ka Raid Nonglyngdoh, u Bah Linus Lyngdoh, Lyngdoh ka Raid Nongpoh, ki ophisar sorkar, ki longsan mansan, ki pator jong ka raid lem bad ki khun ki hajar kiba hap hapoh ka Raid Nonglyngdoh.
Lyngba katei ka sngi lah ruh ban sakhi ïa ka jingriewspah, ka bam ka dih tynrai, ki riam ki beit, ki jingshad tynrai ba kum ka Raid ka da angnud ban pynim bad pynneh pynsah ïa ki.
Haba kren ha katei ka sngi na ka liang u Bah Sosthenes Sohtun u la paw ka jingkmen bad ka jingitynnad ba ka Raid Nonglyngdoh ka dang pynneh pynsah ïala ka kolshor, namar ka kolshor ka long kum ka jinglong trai ban pyni sha ka pyrthei ïa ka jinglong ba kyrpang khamtam ki riti ki dustur, namar lada ki riti ki dustur ki iap ka jaitbynriew ruh ka iap.
U la ong ruh ba kane ka jingleh kmen ha kane ka sngi ka pyni ïa ki dak ki shin jong ka jingkyrmen ïa ka jaitbynriew bad kyrpang ïa ka raid nonglyngdoh, namar ka jingshimkhia bad ka pynwandur da ki nongïalam ban kynmaw ïa kaei kaba u mynbarim u la buh.
Ka jingshad tynrai ka pyni ïa ka jinglong ba kyrpang namar kano kano ka raid ka bym don shuh ïa ka jingkynmaw ïa ki mynbarim, ka la long kum u diengbah u bym don thied ryngkat ka kyntu kynpham ba kane ka jingrakhe bad ka shad sajer kan long kum ka jingkyrsiew thiah ïa ka jaitbynriew bad ka raid Nonglyngdoh baroh kawei bad pynim bad pynneh pynsah ïala ka dustur tynrai.