Nongpoh, Nailar, 27: Uwei u rangbah u la duhei ïa la ka jong ka jingim na ka jingmynsaw jur hadien ba u la shah syllad ha kawei ka kali ka bym lah ban ithuh ha Lumumpih ha surok Umsning By-Pass.
Kane ka la jia ha ka janmiet sngi Saitjaiñ ha ka por 5:00 baje eiei ha kaba une u rangbah uba la tip kyrteng kum u Bah Hamanroy Cajee, 56 snem uba trei ha ka tnad Agriculture, Shillong u dang thmu ban leit phai shala iing hadien ba u la wan na jaka trei hynrei yn da poi ha ka shnong Lumumpih shuwa ba un leit sha la iing u la ngat ha kane ka jingjia ha kaba kawei ka kali rong iong bym lah satia ban ithuh ka la syllad beit ïa u bad hadien ba dep tynrah ka la phet krad na kane ka jaka.
Ïa une u rangbah la pynkit marmar sha Umsning CHC hynrei ki doctor ki la pynbna ba u la khladnoh shuwa ban poi sha jaka sumar namar ka jingmynsaw kaba jur. Na ka liang jong ki Pulit ki dang pynlongka jingtohkit ban lapdien ïa ka kali.
