Ïakynduhlang ki kyrtong ka VPP Jaiñtia Hills ha Nangbah, tuid da ki hajar ki nongkyrshan

Jowai, Rymphang 19: Ki paidbah nongkyrshan jong ka seng Voice of the Peoples’ Party (VPP) mynta ka sngi 19 tarik kaba dei ka sngi pynkut ïa ka jingïalap Election MDC kila hiar da ki hajar ngut sha ka jingïakynduh lang jong baroh ki kyrtong jong katei ka Party ha shnong Nangbah, West Jaiñtia Hills.
Ïa kane ka ‘Jingïalang Paidbah’ la pynlong haka shnong Nangbah, Dukhu, West Jaiñtia Hills District, bad la pynïaid ïa ka jingïalang da ka kyrtong na ka 28Narpuh Constituency ka kong Deivipaya T. Tongper. Katba na ka liang ki kyrtong ka VPP kila ai ki jingkren sha ki paidbah nongkyrshan bad ban pynsngew ïa ki nongrim jong ka seng lyngba ka Moto kaba ong ‘ban pynim pat, ban pynbha pat bad ban pynkylla dur’.
Ha kane ka sngi la sakhi ïa ki nongkyrshan jong ka VPP na kylleng ki jaka jong ki Constituency ka Rilum Jaiñtia kila wan tuid sha katei ka jingïakynduh lang ba khadduh, ha ka jingïalap election ban pynkut ha katei ka shnong Nangbah, hadien kane kitei ki paidbah kila ïashad kmen hadien ba la wai ka jingïalang.
Na ka liang ka party VPP kala pynïeng kyrtong ha baroh ki 29 tylli ki Constituency sha JHADC, ha ka juh ka por kum ka party ka don ka jingthrang ban jop bun ïa kane ka jingïakhun Election mynta ka kynti. Kum ban shu pynkynmaw ba ka party VPP dang ha kane ka Election MP kaba la dep kala jop ha kiba bun ki Constituency hapoh ka Ri-Lum Jaiñtia.