Pyrkhing pahara ha ki 224 tylli ki Polling Station kiba lah ban mih jingkulmar ha Khasi bad Jaintia

Shillong, Rymphang 19 : Ki bor synshar district ki la rai ban pyrkhing bha ka jingpahra ha ki 224 tylli ki Polling Station ba la ithuh kum ki polling station ba lah ban jia ki jingkulmar bad ba don jingma ha kane ka elekshon Khasi Hills Autonomous District Council (KHADC) bad Jaintia Hills Autonomous District Council (JHADC), ban long la 21 tarik Rymphang.
Kat kum ka jingpyntip u Commissioner & Secretary ka Tnad District Council Affairs (DCA) Bah Cyril Diengdoh, haduh 129 tylli ki Polling Station naka 1669 tylli ki dei kiba hap hapoh u pud u sam ka KHADC katba 95 tylli naka 477 tylli ki hapoh u pud ka JHADC.
Une u Heh Ophisar ula kular ïa ka jingbuh bor pahara kaba khlaiñ ha kine ki jaka ban pynthikna ïa ka elekshon kaba khuid, kaba ïaid beit ïaid ryntih.
Haba ïakren bad ki nongthoh khubor, u Bah Cyril ula ong “Baroh ki jingpynkhreh ki la biang lut. Ngi la shong jingïalang bishar kam la bun sien bad ki Deputy Commissioner, kiba pynïaid ïa ka elekshon. Ki plan halor ka rukom pahara ruh kala biang lut. Ki Deputy Commissioner kila ithuh ïa ki jaka kiba lah ban mih jingkulmar bad ba don jingma ha kaba la buh kham bun ki bor pahara ha ryngkat ka jingïasyllok bad ki SP”.
“Ki Pulit kila sngewskhem ban lah pynïaid beit ïa ka elekshon naba kila wanrah bun bha ki bor Pulit kynthup ki home guard bad kumta, kam don jingduna satia” ula ong haba bynrap “ïa kine ki bor pahara la wanrah na kylleng ki jaka ka Jylla bad naba ka elekshon ka long ha Eastern Range, la wanrah bun ki bor pahara na Ri-lum Garo kaba dei ka Western Range ka Jylla” ula ong.
Nalor kane u ïathuh ba u Chief Secretary ka Jylla ula pynïaid ruh ïa ka jingïalang pyrkhat kam bad ki Deputy Commissioner. “U Chief Secretary ula leit jurip ruh ïa kawei na ki centre ha Shillong kaba dei ha ISBT, Mawiong, kaba mih ki nongpyïaid ïa ka elekshon ryngkat ki tiar ki tar bad ruh ka jingniew vote ka ban long la 24 tarik Rymphang” ula ïathuh.