Shillong, Nohprah 22: Hadien shi bnai ka jingjia ha Mukroh, u Myntri Rangbah ka Meghalaya, u Conrad Sangma bad u Myntri Rangbah ka Assam, u Himanta Biswa Sarma, ki la ïakynduh ha ka Sngi Balang Guwahati ban ïakren halor kiei kiei kiba la mih na ka jingshah siat jong ki 5 ngut ki briew ha Mukroh, kaba la jia ha ka 22 tarik u bnai baladep.
Haba kren ha ki nongthoh khubor ha ka por ba plie ïa ka Building jong ka Shillong Press Club, u Conrad u la ïathuh ba kane ka jingïakynduh ka la neh kumba shikynta shiteng bad ïa la ïoh ban ïakren bun kiei kiei kiban ïarap ban weng ïa ki jingeh jong ki paidbah ha khappud.
Kawei na ki mat ba la ïakren, la ong u Conrad ka long ban weng noh ïa ka jingïakynad ha khappud, khnang ban ailad ïa ka jingïakren pynbeit ba kan ïaid shaphrang.
“Ngi la ïakren ba kiba kum kine ki jingjia kim dei ban jia shuh nangne shakhmat ryngkat ruh bad ka jingïakular ban ïatyngkan hapdeng jong kine ki artylli ki jylla na ka bynta ka suk ka saiñ ha ka jylla”, u la ong.
Lah ban kdew hangne ba ha ka 22 tarik u bnai baladep, san ngut nong Mukroh ki la ïap haba ki Pulit Assam ki la siat ïa ki paidbah kiba la ïamih ban dawa ban pyllait ïa ki lai ngut ki para Shnong kiba la shah kem ha ki Pulit Assam halor ka jingkynnoh ba ki tuh dieng na khlaw Assam. Arngut kiwei pat ki la mynsaw jur bad la sumar ha NEIGRIHMS bad mynta ki la leit phai sha ïing.
Namar kane ka jingjia ha Mukroh, ka jingïakren pynbeit pud hapdeng kine ki artylli ki jylla na ka bynta ka khep kaba ar ne ka Second Phase ruh ka la sangeh noh shuwa.
