Hadien 30 snem ïoh Shlem treikam ba pura ka Shillong Press Club

Nguh burom ïa ki Nongïakhun Hill State

0

Shillong, Nohprah 22: Hadien laiphew snem ba ka la ïaid lynti, ka Shillong Press Club, mynta ka sngi ka la ïoh la ka jong ka Shlem treikam kaba pura, haba u Myntri Rangbah ka jylla, u Conrad Sangma, u la plie ïa ka ïing treikam kaba don ha ka shlem treikam jong ka tnad Directorate of Information and Public Relations.
Naduh u snem 1992, ka Shillong Press Club ka la tyngkhuh shibun ki jingeh ha ka ba pynshlur bad kyntiew ia ki nongtrei pathai khubor ki ba shah ia u slap ka lyer lyngba ki ryta, wat lada ka longrynñieng jong ki la kyrda borbah ha manla ki khep. La ñiew ïa ka kam pathai khubor kum kawei na ki mawdong jong ka synshar paidbah, hynrei ki shlem pathai khubor bad ki riewtrei pathai khubor ki la shah lynsher ha ki ba bun ki jingeh na baroh ki liang ha ka jingpyrshang ban pathai ki khubor bahok bad shisha sha ki paidbah bad ka imlang sahlang. Jar la katta, hapoh ka jingialam jong u Bah David O Laitphlang, kiei kiei baroh ki la kylla bad ka sorkar ka la shahshkor ban ai sngewbha da ka shlem treikam ka ba iaineh bad thikna.
Ïa kaner ka shlem treikam thymmai jong ka Shillong Press Club la plie da u Myntri Rangbah ka Jylla ha ka ba la don ryngkat ki kynrem lyndan ba kynthup ïa u Prabin Bakshi, Commissioner and Secretary, Bah Israel Ingty,  Secretary, u M Sangma, Director of Information & Public Relations, Meghalaya bad u dkhot rangbah jong ka Press Council of India, u Jaishankar Gupta.
Ka shlem treikam thymmai ka don la ka kamrabah pathai khubor, ka kamra shongkai bad ki kamra trei jong ki nongtrei pathai khubor ryngkat bad ka bynthuiñ snurpathai (internet network). khnang ban pynphuh pynphieng ia ka shlem treikam thymmai, ka Shillong Press Club ka la aiti ha ki barikor jong ka Riti Academy na ka bynta ban  thohdur ki ba iadeidur bad ka kam pathai khubor. Ha ka ba iadei bad kane, ki barikor ki la pynkhreh da ki dur boit bad ki dur shisha jong ki rangbah iakhun na ka bynta ka Jylla Rilum katkum ba la bthah da ki khliehduh jong ka Shillong Press Club bad Riti Academy.
Kane ka long kum ka daw ban nguh burom ia kita ki rangbah ki ba la len lade na ka bynta ban ioh la ka jylla Rilum ba laitluid naduh u snem 1972 bad na ka bynta ban rakhe ia ka lyngkhuh sanphew snem jong ka jylla Meghalaya. Ha kata ka shlem treikam la mang da ka kynroh ainam ka ba nyngkong ka ba kynthup ia ki myntri jylla ba nyngkong eh ki ba kynthup ia u Capt. Williamson A Sangma, Myntri Rangbah bad kiwei pat ki myntri, Bah B B Lyngdoh, Bah Edwinson Bareh bad Bah S D D Nichols Roy. Ha ka kynroh ainam ba bud la pynieng da ki dur jong ki rangbah ba la noh synñiang ba kham khraw ha ka imlang sahlang kum u Bah Radhon Sing Lyngdoh, Martin N Majaw, P Ripple Kyndiah bad Bah Peter G Marbaniang. Ha ka kynroh ainam ba marbud pat la buhti ia ki dur jong u Bah Hoover Hynniewta, Bah Darwin D Pugh, Bah Stanling D Khongwir bad Bah Sanford K Marak. La khmihlynti ba yn dang pynieng shuh shuh ki kynroh ainam ha shlem treikam jong ka Shillong Press Club ha ki sngi ki ban dang wan hadien na ka bynta ban nguh burom ïa kiwei kiwei pat ki rangbah iakhun Jylla Rilum ki ba kham shynna.
Haba kren ha ka jingïalang ba la pynïaid da u General Secretary ka SPC, u Bah Powell Sohkhlet, u Myntri Rangbah u la pynpaw ka jingsngewkmen ba kane ka kynhun ïatreilang ki nongthoh khubor ka la ïoh la ka jong ka ïing ban treikam treijam. U la ong ba laiphew tylli ki snem kadei ka por kaba la slem, hynrei wat hapdeng kine ki jingeh, pynban ki nongthoh khubor ki la ïai trei ban shakri na ka bynta ki paidbah bad ban pynneh bad nang pynskhem ïa ka jingsynshar paidbah. Ha kajuh ka por u kyntu ïa ki nongthoh khubor ban ïai long borabor kiba ïeng pdeng haba ki trei ïa ka kam kum ki nongpathai khubor.

Leave A Reply

Your email address will not be published.