Hadien 4 snem ba lait im da ka said ujor FIR biang ka Kong Agnes bad Amita

“Dang jyllei ka jingkhaïi dewïong beaiñ”

0

Shillong, Nohprah 20 : Hadien saw snem ba la lait im da ka said na ka kti ki riew runar khaïi dewiong beaiñ ha East Jaintia Hills, hynrei ki arngut ki nongtrei seng bhalang kiba ym lah shah ïa ki kam beaiñ bad ki bym riej ban ïeng ha ka nongrim jong ka hok kata ka Kong Agnes Kharshiing bad ka Amita Sangma ki la ujor FIR biang ha Jhalupara Police Station hadien ba ki la lap da la ki jong ki khmat ïa ka trok ba kit dewiong beaiñ uba dei u dewiong uba dang dep tih na ki thaiñ Shallang ban pynpoi sha Guwahati lyngba ka nongbah Shillong.
Kat kum ka FIR ba la ujor la pynpaw ba katba ki dang wan phai na Mawkyrwat bad haba la poi ha Upper Shillong, Lumdiengpun, ki la lap ïa ki bun tylli ki trok dumper ba kit ïa u dewiong ba la dep thang u coke. Haba ki la talasi ryngkat bad ki pulit ïa kawei ka trok kaba don u number plate na Assam ki la lap ba ka kit ïa u dewiong uba dang shu dep tih na Shallang. Kumta halor kane ki la kyntu ïa ki bor pulit ban leh ia kaba donkam kat kum ka ain.
Lah ban pynkynmaw ba kine ki arngut wat la ki la lait im da ka said hynrei ki la pynpaw pat na ka por sha ka por ba kin ym riej ne kynrandien ban sei madan ïa ki jingshisha bad ban paw pyrthei ka hok. Dei na kata ka daw ruh ha kane ka kynti mar ïa lap da la ki jong ki khmat ba ka jingtih dewiong beaiñ bad ka jingkhaïi dewiong beain ka dang ïai bteng beit ha ka jylla bad mynta sa sha West Khasi Hills kumta ki la ujor da ka FIR khnang ba ki bor pulit kin leh ïa kaba donkam baroh kat kum ka aiñ.

Leave A Reply

Your email address will not be published.