Hadien ba la dep thok, shukor bad bam klop ha WB phai khmat ka TMC sa sha Meghalaya : BJP

Shillong, Nohprah 22 : Ka BJP ha kane ka jylla ka la ther tyngeh ïa ka TMC namar ki kam kular thok kular shukor jong ka ïa ki paidbah namar ki nongïalam kane ka party ki la dep thok dep shukor, dep bamklop, thaw jingkulmar, pynhuri hura shnong da ki kynhun runar jongka ha West Bengal mynta pat ki phai khmat ban leh ïakine kijuh ki jaitkam ha kane ka jylla.
U nongpathai khubor ka BJP ha kane ka jylla u bah M.Kharkrang u la ong ka TMC ha Meghalaya ka long thik kum ka East India Company namar ka la wan sha kane ka jylla da kata ka jingthmu ban pynjot pynpra bad pynthut ïa ka shongsuk shongsaiñ bad pynlong ïa kane ka jylla kumba la leh ha West Bengal.
U bah Kharkrang u la ong ka TMC ka dei ka seng saiñ pyrthei jong ka West Benal bad kam don kano kano ka jingsngewthuh ïa ki paid Meghalaya.U la ong ka jingkob jongki ba ki kwah ban ïalam ïa ka jylla da ki trai jylla ka dei tang ka buit namar ka jingkyrwait shabi pat kan long na West Bengal. ïa kane la paw shai na ki jingkular thok ba ki la ai sha ki paidbah. U la ong ba ki kwah ban pyntreikam ïa kaei kaba ki la pheil ha West Bengal hangne ha Meghalaya ruh.
U bah Kharkrang u la buh ka jingkylli halor kata ka jingkular na ka ‘We Card’ da kaba u ong ba kane ka skhim kaba la pheil ha West Bengal kaba la tip kum ka skhim da ka kyrteng Lakshmir Bhandar. La pyntreikam ïa kane ka skhim da kaba shu ai tang sha kito kiba ki kwah ban ai. Ki dkhot ka party ki ïoh jingmyntoi bun shah katba kiwei pat kim ïoh satia ïa ka skhim. Kane ka skhim ka ai jingmyntoi ïa ka TMC namar lah ban pyndonkam ïa ka pisa bad pynkylla ruh ïa kiwei ki skhim sha kane ka skhim.
U la ong ka jingkob ba lyngba ka We Card ki longkmie kin kham ïoh bor, hynrei kaba lyngngoh ka long ba ka jinglong jingman ki longkmie ha West Beangal ka long kaba i sangsot ban peit. Dei ha West Bengal ba jur eh ka jingshah leh beijot, jingshah rahbor ki longkmie bad ki kynthei khynnah. Ka jingleh beijot ha West Bengal ka jia man la ka phra kynta hapoh ka jingïalam bad jingsynshar jongka TMC.
Kumta hadien ba ki la pynjot thiaw ïaka West Bengal mynta ki phai khmat ban leh kumjuh ha kane ka jylla. U la ong ka saiñ pyrthei ha ka jylla ka dei kaba jai jai bad ka bym don jingïakulmar lait noh tang ha ki khep ki khep. Katba ïa ka TMC pat la tip bad bna nam kum ka seng kaba thaw jingkulmar bad pynhiarkput. Ka ri hi baroh kawei ka peit bad ïohi ïa kine ki kam thombor jong ki briew ka TMC kiba shu pynhiar kput beit khamtam kumba la ïohi ha ka election ba la dep ha ka jylla West Bengal. Ki jingshah pyniap ki jia man la ka sngi.
Halor ka jingkren jongu Abhishek Banerjee ba ka TMC ka dei tang ma ka ka party kaba ïeng ban ïakhun pyrshah ïaka BJP u bah Khrkrang u la ong ha kawei pat ka liang ka BJP ka dei tang ma ka ka party kaba ïeng na ka bynta ki paid nongshong shnong ka Meghalaya.