ïakynduh ka Seng JNC 7 Shnong ïa u EE-PWD ba buh jingma ka jingkieng Um-su-wai kaba la tor

Khliehriat nohprah 06: Hynne ka sngi Balang ka seng Jaiñtia National Council (JNC) 7 Shnong Circle hapoh ka jingïalam jong u Bah Mehi Rymbai incharge ka 7shnong Circle bad u President ka 7shnong bah Wishes Siangshai ka la leit ban ïakynduh markhmat ïa u EE ka PWD Khliehriat Division ha ryngkat ka jingthoh ban kyrpad ïa ka ophis jong u ban maramot noh ïa ka jingkieng nar (iron bridge) kaba tip kyrteng kum ka “Lyngkieñ Um-su-wai” ha East Jaintia Hills, kaba don ha ka surok Wah-Kmai-Um, Musniang Rangad Road (WMR Road) kaba la jot la tor bad buh jingma ïa ki nongleit nongwan.
ïa kane ka jingkieng la shna ha ki snem 90 bad mynta ka la buh jingma shibun ïa ki paidbah namar katei ka jingkieng ka la jan dkut bad hap shapoh ka wah ha kano kano ka por namar bym biang shuh ki nar kiba kyrshan ïa ka.
Katei ka jingkieng kaba jrong haduh 140m la ong ruh ba ka dei ka jingkieng kaba jrong tam ha East Jaintia Hills, abd ka dei ka jingkieng kaba pynïasoh ïa bun tylli ki shnong kynthup ïa ki 7 shnong na Ladrymbai sha Moolamanoh, Mulang, Musniang, Musniang Rim, Moo-Nongtdu bad Lumputhoi nalor ki San Shnong kiba kynthup ïa ka Mutong, Cham Cham, Lum Shyrmit, Mukhaialong bad Pynthorsale hashwa ba kan pynïasoh biang bad u Surok bah National Highway NH-6 ha Kongong.
Ka Seng ka la ong ruh ba kane ka surok ka long ruh kum u surok by-pass kaba ki paidbah ki pyndonkam ha ka por dheng kali ha u surok bah NH. Kum ban shu pynkynmaw ba ha kine ki sngi ba la dep ka seng ka lah dep ban pan ïa ka kaiphot na ka tnad PWD lyngba u Deputy Commissioner na ka bynta ban pynshna noh ïa katei ka jingkieng, bad na ka Liang ka tnad PWD ruh ka la dep ban phah ïa katei kakaiphot sha ki bor ba halor ban mang ne sanction na ka bynta ban maramot.
Ha kane ka jingïakynduh bad u EE na ka liang jong u, u la kular ban shimkhia halor kane ka bynta bad ban leh ruh ïa ka ba donkam khnang ba kan long ka jingmyntoi na ka bynta u paidbah.
Na ka liang ka seng kala ban jur ruh hakhmat u EE ba ym dei ban kut tang ha ka jingthoh ne jingkynduh hynrei ka jingkyrpad hi ba ka kam ka dei ban ïaid shakhmat bad ba ka kam ka dei ban urlong namar katei ka jingkieng kam dei tang ka jingïaid lynti hynrei dei ruh ka ïap ka im jong ka thaiñ hi baroh kawei, bad na ka liang ka seng kan ïai bteng ban buddien ha kaba ïadei bad kane ka kam.