Namar ka jingeh ki paidbah, sha u Chairman ka MRB pynsngew u MLA ka Mawkyrwat

Mawkyrwat, Nohprah 06: U MLA ka Mawkyrwat Constituency, bah Renikton Lyngdoh Tongkhar mynta ka sngi da ka mynsiem jong ka jingkitkhlieh ïa u paidbah jong ka dong ka thaiñ u la ai da shithi sha u Chairman jong ka Meghalaya Rural Bank (MRB) ban dawa na u ba u dei buh noh sa ki katto katne ki tnad ne jaka pynlang pisa hapoh ka South West Khasi Hills District.
Haba kren ha ki lad pathai khubor, u bah Renikton Lyngdoh Tongkhar u la ong ba kane ka jingleit ban ïa kynduh jong u ryngkat ki ‘riew rangbah ïa u Chairman ka Meghalaya Rural Bank ka long ban kyrpad ïa u ban plie biang noh sa da kiwei de ki tnad treikam ba thymmai namar haduh mynta kum kine ki jaka pynlong pisa jong ka MRB ki don ar tylli bad kane ka long kaba eh ïa ki paidbah ban pyndep ïa ki kam bad ma ki ruh ki hap ban ïeng da u laiñ uba jrong da ki bun bun kynta tang ban ïoh ban thep ne sei pisa.
Ha ka shithi ba u bah Renikton u la phah u la kyrpad ïa u Chairman ka MRB u la ong ba ka la i dei ba ki tnad treikam jong ka Meghalaya Rural Bank (MRB) ki dei la kumno kumno ban don ha ki shnong kiba kham jan bad ki jaka ïew khnang ba haba ki paidbah ki wan donkam kan long ka kam kaba kham pynsuk ïa ki ha ka leit ka wan. Shuh shuh u la pynpaw ruh lada ka MRB kan buh, la i dei ruh ban don kawei kum ha Umdohlun ne ha Rangblang, ne ha Rangthong ne ha ki jaka ba kham kyndong khnang ba ka jingai jingshakri ïa ka paidbah kan long kaba ïaid beit.
Ha kawei pat ka liang u la ong ba katkum ka jingïakren bad u Chairman ka MRB u la pyntip ba na ka liang ka Department ka la dep ban buh ruh ïa ki bank sakhi ne ki Customer Service Point (CSP) jong ki bank bad pyntip ruh ba la kine ki treikam ne em kumba la bhah ba kin long ki nongïarap ïa ki paidbah, hynrei lada kine kim treikam yn khot thymmai noh da kiwei khnang ba ki paidbah kin nym ïa kynduh jingeh ha kaba ïa dei bad ki kam ha ki bank. “Haba peit ne phai pat ïa ka lynti kaba jngai, kaba donkam mynta ka la i dei ban don beit ïa ki tnad treikam kiba thymmai ha ki shnong kiba marjan jong ka Mawkyrwat ne ha ki jaka ba kham kyndong”, ong u bah Renik.
Kumta u la buh ka jingkyrpad ïa ki paidbah jong ka dong ka thaiñ ba haba la ki don kita ki bank sakhi kan bha ïa ki ba kin pyndonkam ïa ki ha ka rukom kaba dei khnang ba kan long ka jingïarap bad ba ki paidbah ruh kin nym da leit ïeng ha u laiñ uba jrong ha ki bank.
Ha kane ka sngi jong ka jingleit ïa kynduh ïa u Chairman ka MRB la synrang da u bah Robertjung Kharjahrin, u bah Polan Sohphoh bad u bah Jes Nongsiej.