Nongstoiñ, Jylliew 18: Ka shnong Lawrynjam ka shnong kaba la rim bha kaba hap ha Mawthadraishan C & RD Block Eastern West Khasi hills kaba don shaphang mihngi na ka shnong Parïong.Ban leit sha katei ka shnong hap ban ïaid da ka kjat lyngba ka lynti khlaw kaba khohruh khohram bad ka shim por kumba shi kynta ei ei.
U nongthohkhubor jong u Mawphor ha ka sngi balang ka 17 tarik Jylliew u la leit ban peit ïa ka jinglong jingman jong katei ka shnong bad la lap ba baroh ki ki nongshong shnong ki dei tang ki nongrep.
Ha katei ka sngi la ïoh ban ïakren bad u bah K.Marweiñ sordar jong katei ka shnong ha kaba u la ïathuh ba ka jingbym don ïa ka surok kali ka la buh jingeh haduh katta katta ïa ki paitbah shnong khamtam ha ka por ba ki pang ki shitom ban leit phah sumar ha Parïong PHC la hap ban shu kit da u briew bad ïaid da ka kjat da kaba kiew ïa ki thiep hiar ïa ki jur bad ka la buh jingeh bha ïa kiba pang.Nalor kata u la ïathuh ruh ba don ki por ba kiba pang ki khlad noh ha shiteng lynti khlem pat da poi ha ka jaka sumar.
Ha kajuh ka por u la ong ba kaba kham shem jingeh ka dei ïa ki longkmie ki ba armet kiba hap ban ïaid da ka kjat ban leit phah check up ha Parïong PHC lada ym don kali ha steshon Parïong ki hap ban ïaid da ka kjat bad ka shim por haduh ar kynta haduh ban da poi ha ka PHC.
Ha kaba ïadei bad ki jingïarap na ka sorkar u la ong ba ki la don kumba katto katne ki long ïng kiba ïong skhim shna ïng hynrei kam don jingmut namar ïa ka dewbilat bad ki nar rod ruh hap ban leit kit da u briew naduh Parïong lane Rngikseh bad ïa u shyiap ruh hap ban leit kit da u briew kumta tang ha ka bai bylla ruh ka skhim ba ki ïoh ka la lut.
U bah Marweiñ u la ong ruh ba kawei pat ka jingeh ka dei ïa ki khynnah kiba leit skul ha Parïong namar ha ka por lyiur ki hap ban kam lyngba jong kawei ka wah bad ha ka por bah ka heh ka um kim lah satia ban kam sha shiliang.Nalor kata ki hap ban kiew ïa ki thiep ban hiar ïa ki jur bad teng teng haba katei ka wah ka dap um ki hap ban pep skul noh.
Haba kylli la ki la ju leit ïakynduh ne em ïa ki nongmihkhmat ba kin pynïoh surok ha katei ka shnong u la ïathuh ba ha ki snem ba la dep la bun sien bun wat ki la leit shaduh Shillong ban ïakynduh ïa u Excecutive Enginee ka tnad PWD bad ki la leit ruh shaduh Shillong ban ïakynduh ïa u Myntri ka tnad PWD hynrei haduh mynta ka sorkar kam shym pat la leh ei ei.
Ha kajuh ka por u la ong ba na ka liang jong u bad ki paitbah nongshong shnong kin sa ïashong pyrkhat ba lada ka sorkar kam phai khmat lem sha katei ka shnong ban pynïoh surok ki lah ban sangeh noh shi syndon ban leit thep vote ha ka por Election .
