ïakhun borbah da ka thma ban rat dyngkong ïa u drok ha jylla ai mynsiem u CM ïa ki Pulit

Shillong, Jylliew 26 : U Myntri Rangbah ka Jylla Conrad K Sangma, u la kyntu ïa ka Tnad Meghalaya Police ba kan ïai bteng ban trei borbah bad ïakhun da ka thma khnang ban lah tehlakam bad ratdyngkhong ïa ka jingjyllei jong u droks hapoh ka Jylla.
U Myntri Rangbah ula pynpaw ïa kane ha ka jingrakhe ïa ka International Day Against Drug Abuse and Illicit Trafficking ba la pynlong da ka Tnad Meghalaya Police ryngkat bad ka Tnad Social Welfare mynta ka Lah Sngi U Blei ha U Soso Tham Auditorium, Shillong.
Haba ai jingkren, u Myntri Rangbah ula ai ka jingïaroh ïa ka Tnad Pulit halor ka jingïohkem ïa ki nongkhaïi droks bad ïoh kurup ïa u droks da ki klur tyngka ha kine ki khyndiat bnai ba la leit noh.
“Nga kyntu ïa ka Tnad ba kan ïai trei ïa ka kam ha ka ban tehlakam bad ratdyngkhong ïa ka jingdih bad khaïi droks hapoh ka Jylla” ula ong haba bynrap “Katba ki bor Pulit ki dang trei ïa la ka kam ngi donkam ban pynthikna ba ki 40,500 ngut ki samla kiba shaniah tylli ha ki droks kin ïoh ïa ka jingsumar da ka jingieid khnang ba kin wanphai biang sha ka imlang sahlang kum ki nongshong shnong kiba don jingkitkhlieh bad kiba tei”.
U Myntri Rangbah ula pyntip ba ka Sorkar ka la pyrshang katba lah ban pynthikna ba ka Jylla Meghalaya kan lait na u droks. “Ki Policy bad ki prokram jong ngi ki dei kiba la pynwandur ha ka rukom ba ngi buh ïa ki briew kiba dei hapdeng eh bad kane ka sienjam ban don ïa ka kynhun ba kyrpang ban ïakhun ïa ka jingkhaïi bad jingdih droks, ka dei shibynta na ki buit treikam ban ïakhun pyrshah ym tang ïa u droks hynrei na ka bynta ka bha ka miat ki samla jong ngi”.
Ula ong ba ka jingrakhe ïa ka International Day Against Drug Abuse ka dei shibynta na ka pla ban pynthikna ba ka Jylla kan lah ban sei ïa ki samla kiba koit ba khiah, kiba long ki nongtei bad kiba don ha jingkitkhlieh naka bynta ka lawei jong ka Jylla.
“Baroh ki prokram kam pynroi bad ki kam ïarap shimet jong ka Sorkar lem bad ki Policy baroh kin long lehnoh ei lada ki samla ki dei kiba ngop ha u droks. U droks u pynjot ym tang ïa u nongdih hynrei ïa ka ïing ka sem, ka imlang sahlang bad ka lawei” ula bynrap.
Haba kren halor ka DREAM Project ne ka Drug Reduction, Elimination and action Mission ba ula pyllait paidbah dang shen, u Myntri Rangbah ula ong ba ka jingmang tyngka ban pyntreikam ïa kane ka Mission ka kot T. 10 klur shisnem ka ban long haduh T. 50 klur ha ka san snem.
“Ka Sorkar kan sa tei ïa ki Rehabilitaion Centre bad ki Detoxification Centre bapher bapher bad ki Seng Trei monsngewbha kin sa ïoh ïa ka jingkyrshan song pisa ban ai jingsumar bad kner ïa ki kti sha ki nongdih droks ha ka Jylla” ula ong.
Ula kyntu ruh ïa ki seng treimonsngewbha, ki sengniam, ki jaka pule, ki dorbar shnong ba kin buh ïa ka jingïakhun pyrshah ïa u droks kum ka kam kaba hakhmat eh.
Ka DREAM kan nang nang pynkhlaiñ ïa ka Meghalaya Drug Abuse Prevention Policy, 2020, ba kan poi sha ka thong ban ratdyngkhong ïa ka jingdih droks hapoh ka Jylla.
Ha kane ka sngi, u Myntri Rangbah ula pyllait paidbah ruh ïa ka Drug Free Meghalaya App, aiti ïa ki Drugs Detection Kits sha ki Anti Narcotics Tasf Force (ANTF), pynkup burom ïa ki seng trei mon sngewbha, ki riew shimet bad ka ANTF halor ka jingtrei shitom ban ïakhun pyrshah ïa u droks bad pyllait paid ruh ïa ka jingrwai “Turn the Tide” ba la rwai da ka Khaki Vibes.
Kiba la iadonlang ha kane ka sngi ki kynthup ïa u Symbud Myntri Rangbah Bah Prestone Tynsong, DGP ka Meghalaya, Dr L R Bishnoi, Additional Chief Secretary, Home, Dr Shakeel P Ahammad, ki Heh Pulit, ki Heh Ophisar na ka Social Welfare department bad ki samla pule na ki skul bapher bapher ka Nongbah Shillong.